Մեծի Տանն Կիլիկիոյ Կաթողիկոսութեան Սիսի Պատմական կաթողիկոսութեան հողատարածքին վերատիրանալու դատին մասին տեղեակ չեն Թուրք պաշտօնեաները: Այս մասին կը գրէ Պոլսոյ «Ժամանակ» օրաթերթի խմբագիր Արա Գօչունեան: Կը նշուի նաեւ, որ Պոլսոյ Պատրիարքական ընդհանուր փոխանորդ Տ. Արամ Արք. Աթէշեան այս եւ այլ թեմաներու մասին խօսած է Պատրիարքութեան յարկին տակ Սուրբ Ծննդեան տօնին առթիւ տեղի ունեցած ընդունելութեան մը ընթացքին: Սրբազանը ընդգծած է, որ ինք այդ խնդրի մասին խօսած է Թուրքիոյ Վաքըֆներու տնօրէնին հետ (Ատնան Էրթիմ), եւ վերջինս Սրբազանին փոխանցած է, թէ իրենք այդ մասին տեղեկութիւններ չունին: Խօսելով դատական գործընթացին մասին՝ Արամ Սրբազան յայտնած է, թէ նման դատ մը իր կարծքիով պէտք է նախ ներկայացուի առաջին աստիճանի դատարաններուն մօտ, մինչ Անթիլիասի Կաթողիկոսութիւնը դատը բացած է Թուրքիոյ սահմանադրական դատարանին մօտ: Արամ Սրբազան, նաեւ ըսած է, թէ ինք վստահ չէ այդ դատի յաջողութիւնէն ու եթէ դատը յաջողի, ապա Թուրքիոյ կառավարութիւնը, որո՞ւ պիտի յանձնէ այդ հողատարածքը: Պատրիարքական տեղապահը մանրամասնութիւններ փոխանցած է այս նիւթին շուրջ Արամ Ա. Կաթողիկոսին հետ իր ունեցած զրոյցներուն մասին, որ չեն եղած ամբողջական: Ան յիշեցուցած է, որ Պոլսոյ Հայոց Պատրիարքութիւնը 1915-էն առաջ իր հովանիին տակ ունէր շուրջ 2000 եկեղեցիներ եւ կալուածներ, հարց տալով, թէ եթէ Թուրքիոյ կառավարութիւնը համաձայնի Սիսի հողատարածքը յանձնել Անթիլիասին, ապա ի՞նչ պիտի ըլլայ միւս եկեղեցիներուն եւ կալուածներուն ճակատագիրը: Սրբազան հայրը աւարտին նկատել տուած է, որ Կիլիկիոյ Կաթողիկոսութեան ներկայացուցած դատական հայցը քաղաքական է, եւ ըսած «Ես կը կասկածիմ այս դատի յաջողութիւնէն, սակայն պէտք է ընդունիլ, որ սա դարձած է քաղաքական հարց մը»: