0.09c
Երեվան
ուրբ, նմբ 08
Յունուարի 29-ին, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, Սուրբ Գայանէ վանքում մատուցուեց Սուրբ Պատարագ: Պատարագիչն էր ՀՀ Զու հոգեւոր առաջնորդ Հոգեշնորհ Տ. Մովսէս վարդապետ Սարգսեանը:
Սրբազան արարողութեանը ներկայ էին ՀՀ Զու գլխաւոր շտաբի պետ, գեներալ-մայոր Էդվարդ Ասրեանը, ՀՀ Զու բարձրագոյն սպայական կազմի ներկայացուցիչներ, ՀՀ ԱԺ Պաշտպանութեան եւ անվտանգութեան հարցերի մշտական յանձնաժողովի նախագահ Անդրանիկ Քոչարեանը, Մայր Աթոռի միաբաններ եւ ՀՀ Զու Հոգեւոր Առաջնորդութեան գնդերեցնէր:
Սուրբ Պատարագի ընթացքում Մովսէս վարդապետնը, խօսելով մեր կեանքում առկայ դժուարութիւնների ու փորձութիւնների մասին, ընդգծեց, որ Տէրը մեզ պատգամում է` «Մի՛ վախեցեք» (Հովհ․ 6:20), քանզի վախը յաղթահարելով, ապագայի յոյսով, հաւատով ու ապաշխարութեամբ կը կարողանանք հասնել փրկութեան նաւահանգիստ:
Անդրադառնալով օրուայ խորհրդին` պատարագիչ Հայր Սուրբը մասնաւորաբար նշեց. «Հայոց անկախ պետականութեան մէջ պատերազմների արհաւիրքներով, մեծագոյն փորձութիւններով, կորուստների ու ձեռքբերումների բովով անցած Հայոց Բանակն այսօր տօնում է կազմաւորման 31-ամեակը: Բոլորս վստահ գիտակցում ենք, որ մեր պետականութեան, անկախութեան, անվտանգութեան գլխաւոր երաշխիքն ու յենարանը Հայոց Բանակն է»:
Վերջում Հայր Մովսէսը աղօթք բարձրացրեց առ Աստուած, որպէսզի Տէրն ուժ եւ իմաստութիւն պարգեւի Հայոց Բանակի իւրաքանչիւր զինծառայողի` ականջալուր լինելու աստուածային «Մի՛ վախեցիր» կոչին, պայքարի ոգով լցուելու, վճռական եռանդով գործելու, քաջութեամբ յաղթահարելու փոթորիկներն ու դժուարութիւնները` յանուն վաղուայ յաղթանակների:
Սուրբ Պատարագի աւարտին, նախագահութեամբ Ամենայն Հայոց Կաթողիկոսի, կատարուեց հոգեհանգստեան կարգ հայրենեաց պաշտպանութեան մարտերում զոհուած քաջարի հայորդիների հոգիների խաղաղութեան ու հանգստութեան համար:
Ապա «Էօրնեկէան» հանրակրթական դպրոցի սրահում տեղի ունեցաւ պաշտօնական ընդունելութիւն, որի ընթացքում Ամենայն Հայոց Կաթողիկոսը Բանակի օրուայ կապակցութեամբ ի դէմս ներկաների իր օրհնութիւնը փոխանցեց ՀՀ Զու բարձրագոյն սպայակազմին, զինուորներին եւ գնդերեցներին:
Նորին Սրբութիւնն ի մասնաւորի անդրադարձ կատարեց Հայաստանի եւ Արցախի առջեւ ծառացած անվտանգային մարտահրաւէրներին, պատերազմի աղէտալի հետեւանքներին եւ դրանց յաղթահարման ու դիմագրաւման գործում Հայոց բանակի կարեւոր առաքելութեանը:
Ամենայն Հայոց Կաթողիկոսը նաեւ իր օրհնութիւնը, գնահատանքն ու սերը փոխանցեց Հայոց բանակի հրամանատարներին եւ զինուորներին` մաղթելով Աստծոյ օգնականութիւնն ու պահպանութիւնը, քաջառողջ կեանք եւ արդիւնաշատ առաքելութիւն ի շինութիւն Հայրենիքի եւ մեր ազգի բարօր կեանքի:
Զինուորականութեան անունից ՀՀ Զու գլխաւոր շտաբի պետ, գեներալ-մայոր Էդվարդ Ասրեանը շնորհակալութիւն յայտնեց Ամենայն Հայոց Կաթողիկոսին ՀՀ Զու նկատմամբ դրսեւորուող մշտական հոգածութեան եւ ուշադրութեան համար` հաւաստիացնելով, որ ՀՀ Զու սպայական կազմը պատրաստակամ է շարունակելու իր առաքելութիւնը Հայաստանի Հանրապետութեան տարածքային ամբողջականութեան պահպանութեան եւ անվտանգութեան խնդիրների լուծման գործում:
