9.09c
Երեվան
ուրբ, փտր 20
ԵՄ 27 երկիրներու ղեկավարները, Պրիւքսէլի մէջ կայացած գագաթաժողովին, միաձայն որոշած են վեց ամիսով երկարաձգել Ռուսաստանի դէմ տնտեսական պատժամիջոցները։ Այդ մասին յայտարարած է Եւրոպական խորհուրդի ղեկավար Շարլ Միշէլը։
«Մենք կոչ կ'ընենք Ռուսաստանին կատարելու գործարքի իր մասը եւ Մինսքի պայմանաւորուածութիւնները», ըսած է Միշէլը:
Ան նաեւ յայտնած է, որ Ուքրանիոյ դէմ յարձակման պարագային Ռուսաստանը պիտի բախի «լայնածաւալ հետեւանքներու եւ այդ յարձակման համար բարձր գինի»:
2014 թուականին Եւրոմիութիւնը պատժամիջոցներ սահմանեց Ռուսաստանի դէմ՝ կապուած Խրիմի հետ: Անկէ յետոյ քանի անգամ անոնք ընդլայնուած եւ երկարացուած են։
Առանց վիզայի կարգի եւ համագործակցութեան նոր հիմնական համաձայնագրի շուրջ բանակցութիւնները կասեցուած են, արգիլուած է Ռուսաստանի շարք մը պաշտօնեաներու մուտքը ԵՄ երկիրներ, իսկ անոնց հաշիւները սառեցուած են։ Ներդրուած են նաեւ առեւտրային, ֆինանսական եւ ռազմական բնոյթի սահմանափակող միջոցներ։
Ի պատասխան՝ Ռուսաստանը արգելք դրած է ԵՄ երկիրներէն շարք մը պարենային ապրանքներու ներմուծման վրայ։
