Շաբաթ օր Պոլսոյ մէջ գրանցուած պայթումին հետեւանքով վիրաւորուած Օքսէն Խաչանեան կը գտնուի բժիշկներու խնամքին տակ, եւ անոր վիճակը կայուն է: Այս մասին «Արեւելք» տեղեկութիւն ստացաւ Օքսէնի եղբօրմէն ՝ Աշոտ Խաչանեանէն: Մեր խօսակիցը նաեւ յայտնեց, որ վնասուած են Օքսէնի երկու թեւերը եւ ան բուժման հանգրուան մը պիտի անցընէ հիւանդանոցէն դուրս գալէն ետք: Ձայնի հաղորդավարութեամբ զբաղող պոլսահայ երիտասարդը Թաքսիմի բնակիչ է եւ այդ օր սովորականին պէս շրջանէն անցնելով կը փութար տուն: Նոյն առումով եւ ըստ Պոլսոյ մեր պաշտօնակից «Ժամանակ»ին, Արսէն Խաչանեանի վիճակը այսօր կը համարուի կայուն: Բժիշկները քաճէ հանած են անոր երկու թեւերը եւ պէտք եղած ստուգումները կատարելէ ետք վերստին պատած վիրաւորուած բաժինները: Վիրաւոր Խաչանեան հիմա ալ կը գտնուի բժիշկներու հսկողութեան տակ: Նշենք, որ Պոլսոյ կեդրոնական «Իսթիքլալ» փողոցին մօտ եղած պայթումին հետեւանքով զոհուած էին 5 անձեր, որոնց գերակշռող մասը զբոսաշրջիկներ էին: Թուրքիոյ իրադրութիւնը կը շարունակէ մնալ մտահոգիչ, ու երկրին մէջ տեղի ունեցած պայթումներուն հետեւանքով վերջին մէկ տարուան ընթացքին զոհուած են 80 անձեր: