21.09c
Երեվան
շբթ, հլս 05
Պաղեստինեան «Համաս» շարժումն Իսրայէլի հետ հրադադարի առաջարկին դրական պատասխան տուած է միջնորդներուն: «Արմէնփրէս»-ի հաղորդմամբ՝ այս մասին գրած է Իսրայէլի Ynet լրատուական հարթակը:
Ըստ պարբերականի՝ շարժման որոշման մասին պիտի յայտարարուի առաջիկայ ժամերուն։
Աւելի վաղ արմատականներն իրենց Telegram ալիքին միջոցաւ յայտնած էին, որ շարժումը կ՚ուսումնասիրէ այն առաջարկները, որոնք միջնորդներէն ստացած են Իսրայէլի հետ Կազայի հատուածին մէջ հրադադարի շուրջ անուղղակի բանակցութիւններու ժամանակ: «Համաս»-ը չէ յայտնած, թէ յատկապէս ինչ կը բովանդակեն քննարկուող նախաձեռնութիւնները: Ընդ որում, զինեալները կը պնդեն, որ հնարաւոր համաձայնագիրը պէտք է ներառէ «Կազայի մէջ հրադադարի երաշխիքներ, այնտեղէն իսրայէլեան զօրքերու դուրսբերում եւ մարդասիրական օգնութեան մուտք անկլաւ»:
Յուլիս 2-ին Maan լրատուական գործակալութիւնը հաղորդած էր, որ Կազայի վերաբերեալ նոր առաջարկը կը նախատեսէ 60-օրեայ հրադադար, 10 պատանդներու ազատ արձակում, 18 զոհուած պատանդներու մարմիններու փոխանցում իսրայէլեան կողմին եւ իսրայէլեան բանակի ջոկատներու ետքաշում շրջափակուած անկլաւի հարաւը գտնուող «Մորակ» գիծէն, որ ինկած է Ռաֆահ եւ Խան Եունիս քաղաքներու միջեւ:
