36.09c
Երեվան
հնգ, հլս 31
Յունուարի 28-ին` Բանակի օրուայ առիթով, Մայր Աթոռ Սուրբ Էջմիածնում մատուցուեց Սուրբ Պատարագ: Պատարագիչն էր Մայր Աթոռի Քրիստոնէական դաստիարակութեան կենտրոնի տնօրէն Գերաշնորհ Տ. Վարդան եպիսկոպոս Նաւասարդեանը:
Սրբազան արարողութեանը ներկայ էին Մայր Աթոռի միաբաններ, ՀՀ ԶՈՒ բարձրագոյն սպայական կազմի ներկայացուցիչներ, ՀՀ ԶՈՒ Հոգեւոր առաջնորդութեան գնդերեցներ ու զինուորներ:
Իր քարոզում Վարդան Սրբազանն անդրադարձ կատարեց Հայոց բանակի կազմաւորման տօնին: «Այսօր Աստծու կամքով մենք յիշատակում ենք 26 տարիներ առաջ հայոց ազատատենչ ոգու, ազատ խօսքի, ազատ ապրելու ոգու այդ բռնկումի յիշատակումը՝ Հայոց բանակի հիմնադրութեան օրը: Տօնախմբում ենք միասին, որովհետեւ Հայոց բանակը կազմուեց այն զաւակների կողմից, ովքեր որ գնացին պաշտպանելու իրենց հոգեւոր եւ նիւթական հայրենիքը, ովքեր գնացին իրենց քրիստոնէական սխրանքը, քաջութեան ոգին դրսեւորելու ընդդէմ թշնամու բոլոր տեսակի յարձակումների: Եւ այնպէս, ինչպէս Ս. Հաղորդութեան խորհուրդը մեզ պաշտպանում է չարի բոլոր նետերից եւ յարձակումներից, այդպէս էլ մեր ազգի զաւակներն իրենց ոգու տոկունութեամբ եւ քաջութեամբ ծնեցին հայ ազգի հերոսական պատմութեան էջը:
Հերոսութիւնը, սիրելիներ, առանց քաջութեան ոգու եւ քրիստոնէական սխրանքի անիմաստ է: Այն միայն, եթէ բանակի պարագայում վերլուծենք, մարդասպանութեան եւ չարիքի գործիք է, բայց եթէ այն նպատակաուղղուած է հայ ընտանիքի, հայ արժէքի ու մշակոյթի, Հայ Եկեղեցու, հայի տեսակի պաշտպանութեան ու պահպանութեան, ուստի օրհնուած է քրիստոնէական Եկեղեցու կողմից, օրհնուած է Հայ Եկեղեցու կողմից, եւ մշտապէս մենք՝ ամէնքս, պարտականութիւն եւ պարտաւորութիւն ունենք այդ յաւիտենական խաղաղութեան ջանքի ու ճիգի մէջ աղօթելու մեր այսօրուայ նիւթական եւ հոգեւոր հայրենիքի խաղաղ ու ստեղծագործ ապրելու իրաւունքը պաշտպանող իւրաքանչիւր հայորդու համար:
Այսօր մենք տօնախմբում ենք ոչ թէ ուրախանալով եւ սին հպարտութիւն տածելով, թէ մենք որպէս վերանկախացեալ հայրենիք ունենք հզօր բանակ, օր աւուր ամուր իմաստութեամբ լցուող եւ հզօրացող հրամանատարական ու զինուորական պատասխանատու կազմ, այլ մանաւանդ այսօր իւրաքանչիւրս պէտք է աղօթենք Տիրոջ հետ հաղորդութեան մէջ լինելու, պէտք է աղօթենք մեր հայրենիքի պաշտպանութեան գործի առաքելութիւնը ստանձնած իւրաքանչիւր հայորդու համար», - նշեց Սրբազան Հայրը:
Ս. Պատարագի ընթացքում՝ Միածնաէջ Մայր Տաճարի Աւագ խորանի վրայ, հանդիսապետութեամբ Մայր Աթոռ Սուրբ Էջմիածնի դիւանապետ Գերաշնորհ Տ. Արշակ եպիսկոպոս Խաչատրեանի, կատարուեց Հանրապետական մաղթանք:
Հոգեւոր դասը եւ արարողութեանը ներկայ ժողովուրդը աղօթք բարձրացրեցին Երկնաւոր Տիրոջը` հայցելով խաղաղ ու անվրդով պահել Հայոց աշխարհը եւ ապաւէն լինել ու զօրացնել Հայոց բանակի արիասիրտ սպաներին ու զինուորներին իրենց նուիրական կոչման մէջ:
Մայր Աթոռ Ս. Էջմիածին
