1.09c
Երեվան
չրք, նմբ 13
Ատրպէյճանի փոխ վարչապետ Շահին Մուսթաֆաեւի գրասենեակը յայտարարած է, որ սահմանազատման գործընթացի ծիրէն ներս պիտի լուծուի «4 արտատարածքային գիւղերու ազատագրման» հարցը:
Տեղեկութիւնը յայտնած են ատրպէյճանական լրատուամիջոցները։
Հաղորդագրութեան մէջ նշուած է Եուխար Ասքիփարի եւ Քեարքիի (Վերին Ոսկեպար եւ Տիգրանաշէն հայկական գիւղեր, որոնք բնակեցուած են), ինչպէս նաեւ Սոֆուլուի եւ Պարխուտարլիի (չբնակեցուած) մասին։
Մուսթաֆաեւի գրասենեակը նաեւ պահանջներ ներկայացուցած է ատրպէյճանական չորս ոչ արտատարածքային գիւղերու (Բաղանիս Այրիմ, Աշաղի Ասկիպարա, Հեյրիմլի եւ Գըզըլգաջըլի) նկատմամբ։ Ատրպէյճան կը համարէ, որ այս գիւղերու պատկանելութիւնն անվիճելի է, եւ անոնք պէտք է անյապաղ «ազատագրուին»։ Այս բոլոր գիւղերը կը գտնուին ՀՀ Տաւուշի մարզ` հայ–ատրպէյճանական սահմանին։
Պաքուն նաեւ յայտարարած է, թէ անհիմն են պաշտօնական Երեւանի յայտարարութիւններն այն մասին, որ Հայաստանի 31 գիւղերուն պատկանող հողերը բռնագրաւուած են:
Նշենք, որ 7 մարտին հայ–ատրպէյճանական սահմանին տեղի ունեցած է սահմանազատման հարցերով յանձնաժողովներու եօթերորդ հանդիպումը՝ ՀՀ փոխ վարչապետ Մհեր Գրիգորեանի եւ Ատրպէյճանի փոխ վարչապետ Շահին Մուսթաֆաեւի նախագահութեամբ:
Յիշեցնենք, որ 15 փետրուարին ՀՀ վարչապետ Նիկոլ Փաշինեան յայտարարեց, որ ՀՀ–ն համաձայն է անգամ մարզ առ մարզ սահմանազատում իրականացնել` ամէն հատուածի մէջ վերարտադրելով սահմանը, ապա իրականացնել զօրքերու դիրքաւորման ճշտգրտում, իսկ արտատարածքային հարցերը ձգել ամենավերջին փուլին։
