1.09c
Երեվան
ուրբ, դկտ 26
Պրիւքսէլի Ս. Մարիամ Մագդաղենացի Հայ Առաքելական եկեղեցւոյ մէջ տեղի ունեցած է 5 դպիրներու ձեռնադրութիւն:
Այս մասին «Արեւելք» տեղեկութիւն ստացաւ խմբագրութեանս յղուած թղթակցութիւնէն, ուր մասնաւորապէս գրուած է , թէ կիրակի, 15 հոկտեմբերին, Ս. Թարգմանչաց տօնի ուրախ առիթով, Պրիւքսէլի Ս. Մարիամ Մագդաղենացի Հայ Առաքելական եկեղեցւոյ Ս. Պատարագին ներկայ եղած է Արեւմտեան Եւրոպայի մօտ Հայրապետական Պատուիրակ եւ Վատիկանի մէջ Հայ Եկեղեցւոյ ներկայացուցիչ` Գերաշնորհ Տ. Խաժակ Արք. Պարսամեան։
Օրուան պատարագիչն էր Հոգեւոր Հովիւ Տ. Զատիկ Վարդապետ Աւետիքեան։
Թարգմանչաց խորհուրդի, Քրիստոնէական հաւատքի, եկեղեցւոյ եւ ազգի ծառայութեան մասին քարոզած է Խաժակ Արբազանը` յորդորելով, հակառակ ամէն փորձութիւններու, երբեք չկորսնցնել մեր հոգեւոր բարձր արժէքները, մեր անհատական ու հաւաքական հաւատքը, յոյսը, սէրը, Աստծոյ եւ ազգին ծառայութեան ոգին։
Յաւարտ Ս. Պատարագին, Սրբազան Հայրը կատարած է ձեռնադրութիւն։ Դպրութեան 4 աստիճան ստացած են, տարիներէ ի վեր եկեղեցւոյ նուիրեալ սպասաւորներ` Թովմաս Եալման, Վահան Եաղըրեան, Միսակ Գէորգեան, Շանթ Դաւիթեան եւ Նարեկ Չանեան։
Յաւարտ Ս. Պատարագի եւ ձեռնադրութեան, եկեղեցւոյ սրահը տեղի ունեցած է հիւրասիրութիւն` ի պատիւ Խաժակ Սրբազանին եւ ձեռնադրուած դպիրներուն։
Բարի եւ նուիրեալ ծառայութեան մաղթանքներ Հայ Եկեղեցւոյ հին եւ նոր` բոլոր սպասաւորներուն։
