0.09c
Երեվան
հնգ, դկտ 26
Հունիսի 28-ի ուշ երեկոյան Ստամբուլի գլխավոր՝ Աթաթուրքի անվան միջազգային օդանավակայանում տեղի ունեցած աննախադեպ ահաբեկչությունը ցնցել է ողջ Թուրքիան: Ըստ Ստամբուլի «Ժամանակ» օրաթերթի գլխավոր խմբագիր Արա Քոչունյանի, երեկ երեկոյան տեղի ունեցածը մեկ անգամ ևս փաստեց, որ ահաբեկչությունը մնում է միջազգային աշխարհի գլխավոր օրակարգի մեջ, ինչի հետևանքով մեծաթիվ մարդկային ողբերգություններ են առաջանում:
«Ստամբուլը հերթական անգամ, կարճ ժամանակամիջոցում կրկին թիրախ դարձավ ահաբեկչության: Դժբախտաբար, ահաբեկչությունը ո՛չ միջագային, ո՛չ էլ թուրքական կյանքից դեռևս դուրս չի գալիս: Երեկ ուշ երեկոյան տեղի ունեցած ողբերգությանը Թուրքիան փորձում է սթափորեն դիմագրավել: Վարչապետ Բինալի Յըլդըրըմն արդեն տեղեկացրել է, որ ահաբեկչություն կատարելու կասկածները կենտրոնանում են «Իսլամական պետություն» ահաբեկչական խմբավորման վրա»,-«Արևելքին» հայտնեց պոլսահայ թերթի խմբագիրը, նշելով, որ Անկարայի ղեկավարությունը դեպքի կապակցությամբ հերթական անգամ շեշտել է, որ ահաբեկչության դեմ պետք է համաշխարհային մակարդակով պայքար ձեռնարկել: «Հանրապետության նախագահ Էրդողանի՝ դեպքից հետո հանդես եկած գրավոր հայտարարության մեջ ասվում է, որ Ռամազանի շրջանին է զուգադիպել այս արարքը, հետևաբար սա նշանակում է, որ ահաբեկչությունն իր թիրախների մեջ որևէ խնդիր չի դնում և այդ ձևով էլ գործում է: Երկրի նախագահը շեշտել է, որ միջազգային հանրությունը պետք է զորաշարժի ենթարկվի և հատկապես ընդգծել է արևմտյան երկրների կողմից զորակցության իր ակնկալիքները»:
Արա Քոչունյանը նաև ասաց, որ Թուրքիան փորձում է միասնական ջանքերով և փութկոտ հաղթահարել ահաբեկչության հետևանքները, այդ առումով արդեն վերականգնվել է Աթաթուրքի անվան օդանավակայանի բնականոն աշխատանքը, բայց, ինչպես նշեց մեր զրուցակիցը, ցնցումի հետևանքները վերականգնելու համար, և առհասարակ, ահաբեկչությունը մարդկության կյանքից բացառելու առումով դեռևս շատ ժամանակ ու աշխատանք է անհրաժեշտ:
«Ահաբեկչներն աշխարհի առաջատար երկրների գլխավոր քաղաքները թիրախ են ընտրում, մասնավորապես մեգապոլիսների դեպքում կատարված հարձակումները նաև բարոյահոգեբանական շերտեր ունեն, քանի որ դրանք նաև երկրի առևտրատնտեսական կյանքի ընթացքի վրա են անդրադառնում»,-մեկնաբանեց Արա Քոչունյանը:
Նա տեղեկացրեց նաև, որ Թուրքիայում ժողովուրդը, վերջին շրջանում մեծ ցավ ու ցասում ապրելով, ողբերգությանը մշտապես դիմագրավում է սառնարյուն և միասնականությամբ: «Այսօր էլ, տեղական մամուլի հաղորդումներից և ԶԼՄ-ների հրապարակումների տոնից դատելով, նկատելի է, որ երկիրը նույն կեցվածքով փորձում դիմագրավել հերթական ցնցումը, որ ավելանում է Թուրքիայի օրակարգի վրա տեղավորված այլ ահաբեկչական խնդիրների վրա»:
Խոսելով ահաբեկչությունն իրականացրած կազմակերպության մասին, մեր զրուցակիցը նշեց, որ այնքան էլ կարևոր չէ, թե որ կազմակերպությունն է կատարել այն, քանի որ հասարակության կողմից դեպքը ընկալվում է միևնույն ողբերգական շեշտադրման ներքո:
«Հասարակությունն այս դեպքը նույնպես ընկալում է որպես երկրի օրակարգի վրա եղած ընդհանուր ահաբեկչական խնդրի շարունակությունը, վարչապետն էլ ընդգծել է, որ անջատողական ահաբեկչության դեմ մղված պայքարի մթնոլորտում են պատահում նաև այսպիսի դեպքեր: Հասարակության ընկալումներում ահաբեչությունը բոլորովին անկախ է՝ որ կազմակերպության կողմից է կատարվել-չի կատարվել, ինչպես է արվել, այդ բոլորը երկրորդական են, քանի որ անիծելի երևույթ է ահաբեկչությունը, և բոլորը գիտակցում են, որ որևէ ձևով տարբերություն պետք չէ դնել ահաբեկչական կազմակերպությունների միջև և որևէ հանգամանք չի կարող բռնությունը արդարացնել»,-Ստամբուլում տեղի ունեցած ահաբեկչությունն այսպես մեկնաբանեց պոլսահայ հրապարակախոսը:
