17.09c
Երեվան
ուրբ, հկտ 09
Եգիպտոսի վարչապետ Շարիֆ Իսմայիլ, ղըպտի ձկնավաճառ՝ Մաժտի Մաքինի եգիպտական ոստիկանատուներէն մէկուն մէջ սպաննութեան կապակցութեամբ յայտարարած է, որ կառավարութիւնը պիտի չխնայէ յանցագործը, ով որ ալ ըլլայ ան: Այս մասին կը տեղեկացնէ «Ալ-Քուտս», նշելով, որ Վարչապետի լրագրողներուն ուղղած յայտարարութեան մէջ առանձնապէս ըսուած է. «Մենք մօտէն կը հետապնդենք հարցը: Եգիպտոսի մէջ կը տիրէ օրէնք ու դատական համակարգ եւ յանցագործը պիտի պատժուի»:
Նշենք, որ Մաքինի ընտանիքը յայտնած էր, թէ առանց յստակ պատճառի, Մեքին ձերբակալուած էր Գահիրէի Էմիրիէ ոստիկանատան կողմէ եւ նոյն օրն իսկ մահացած էր խոշտանքումներուն հետեւանքով: Սակայն ոստիկանատունը իր հերթին հերքած էր այս մէկը, յայտարարելով, թէ Մաքին մահացած էր արեան շրջանառութեան սուր անկման հետեւանքով, իսկ ձերբակալութեան պատճառ հանդիսացած էր անոր թմրանիւթեր կրելը:
Յիշեցնենք, որ եղելութիւնը մեծ աղմուկ բարձրացուցած էր երկրի քաղաքական, լրատուական եւ ընկերային շրջանակներուն մէջ, պահանջելով օրինական հետաքննութիւն: Նշենք նաեւ, որ մեղադրեալ սպան ազատ արձակուած էր, դատական բժիշկի ներկայացուցած զեկոյցէն ետք, որու համաձայն Մաքինի մահը եղած էր շաքարախտի հետեւանքով:
