30.02c
Երեվան
կրկ, հլս 05
Թուրքիան վտանգաւոր վայր է քրիստոնեաներու համար, Ahval կայքին իր յօդուածին մէջ գրած է Նուրսան Պայսալը:
Ապրիլին «Ամերիկայի ձայն» կայքը լուսանկար հրապարակած էր, որուն մէջ Տիարպէքիրի հայերը սրճարանի մէջ կը տօնեն Զատիկը՝ հնարաւորութիւն չունենալով այն նշել եկեղեցիներու մէջ:
Պարետային ժամը սահմանուած էր Թուրքիոյ հարաւ-արեւելեան շրջանին մէջ քիւրտ ապստամբներու եւ թուրք զինծառայողներու միջեւ բախումներէն ետք: Ռազմական գործողութիւնները աւարտած են 2016 թուականի սկիզբը, որու ընթացքին աւելի քան 1000 մարդ զոհուած է, իսկ հարիւր հազարաւոր մարդիկ անտուն մնացած:
Դիտորդներու խումբը բազմաթիւ հաղորդագրութիւններ հրապարակած է 2015-2016 թուականներուն բախումներու ժամանակ իրաւունքներու խախտման մասին: Սակայն քիչ կը խօսուի տարածաշրջանի փոքրամասնություններու, ներառեալ՝ հայերու, ասորիներու, խալդերու եւ քրիստոնեայ այլ խումբերու վրայ ազդեցութեան մասին:
Ձերբակալուածներու շարքին տեղի ասորիական եւ խալդական համայնքներու առաջնորդներ կային, որոնցմէ մէկն էր Սատա Իտէ Օշանը՝ ասորիներու միութեան նախագահը: Անոր մեղադրած էին ահաբեկչական կազմակերպութեան անդամակցելու մէջ եւ ձերբակալած: 14 ամիս անց ան ազատ արձակուած եւ փախուստի դիմած էր երկրէն:
2017 թուականի մարտին ոստիկանութիւնը ձերբակալած էր նաեւ ասորացիներու եւս մէկ առաջնորդ՝ մեղադրելով Քրտական բանուորական կուսակցութեան անդամակցելու մէջ:
Նուրսան Պայսալը կը պատմէ, որ վերջերս Փարիզէն վերադարձած է խալդացի յայտնի քրիստոնեայ Պետրուս Քարատայը: 30 տարի անց ան որոշած է օգնել կառուցել իր հարազատ գիւղը Շիրնաքի մէջ: Երբ ան տեսած էր, թէ ինչպէս թուրք զինուորականները իր գիւղի մօտ կը կրակեն, այդ մասին խիզախօրէն պատմած էր լրագրողներուն: Այդպիսով, անոր եւս մեղադրած էին Քրտական բանուորական կուսակցութեան անդամակցելու մէջ եւ ձերբակալած էին 2018-ի սկիզբը:
Այդ ձերբակալութիւնները, Պայսալի խօսքով, ազդանշան են քրիստոնեաներու համար, որոնք դեռ կ'ապրին Թուրքիոյ հարաւ-արեւելքը, եւ անոնց համար, որոնք շատոնց հեռացած են եւ յոյս ունին վերադառնալ: Շատ քրիստոնեաներ, որոնք դեռ կ'ապրին այդ տարածաշրջանին մէջ, սկսած են վաճառել իրենց տուներն ու մեկնիլ Արեւմուտք: Բռնութիւնն ու ճնշումները սարսափի մատնած են անոնց:
Ասորացիներէն մէկը, որ արտակարգ դրութեան ժամանակ կորսնցուցած է իր աշխատանքը, լրագրողի հետ զրոյցի ժամանակ ըսած է.
«Եւրոպայի ասորացիները կորսնցուցած են Թուրքիա վերադառնալու յոյսը: Անոնք ստիպուած էին լքել քրտական քաղաքները: Ես վաճառեցի տունս եւ այժմ կ'ապրիմ արեւմտեան Թուրիքա: Թուրքիան քրիստոնեաներուն համար վտանգաւոր վայր է: Այն վտանգաւոր է անոնց համար, որոնք կ'օգտագործեն ցեղասպանութիւն բառն ու արդարութիւն կը պահանջեն 1915-ի իրադարձութիւններու համար: 100 տարի անց մեզի երկրորդ արտաքսում կը սպասէ»:
