3.09c
Երեվան
ուրբ, փտր 27
Թուրքիոյ դատախազութիւնը կը պահանջէ երկու յայտնի կատակերգուներ՝ Մեթին Ակփինարին ու Միւետաթ Կեզէնին դատապարտել 4 տարի 8 ամսուան ազատազրկման՝ նախագահ Ռեճէպ Թայէպ Էրտողանը «վիրավորելու» համար:
Պոլսոյ գլխաւոր դատախազութիւնը հետաքննութիւնը սկսած է 2018-ին՝ Public Arena հեռուստաշոուի ժամանակ կատակերգուներու ըրած մեկնաբանութիւններու պատճառով:
Չորեքշաբթի օր կայացած երկրորդ լսումներու ժամանակ դատաւորը յետաձգած է նիստը մինչ 1 մարտ, որպէսզի ամբաստանեալներուն ժամանակ տայ իրենց յայտարարութիւնները պատրաստելու համար:
79-ամեայ Ակպինարին կը հետապնդեն այն բանէն ետք, երբ ան մեկնաբանած է Էրտողանի սերտ յարաբերութիւնները Ռուսաստանի նախագահ Վլատիմիր Փութինի հետ՝ ըսելով, որ յարաբերութիւններու բարելաւումը կրնայ յանգեցնել անոր հրաժարականին: Անոր խօսքով՝ այդպէս եղած է Թուրքիոյ նախորդ ղեկավարներու պարագային: «Ով դիմած է Ռուսաստանին, բացի Մուսթաֆա Քեմալ Աթաթուրքէն, ստիպուած եղած է լքել իր պաշտօնը: Ատնան Մենտերսը հանդիպում նշանակած էր եւ յեղաշրջում տեղի ունեցաւ: Նոյնը պատահեցաւ, երբ Սուլէյման Տեմիրելը շրջուեցաւ դէպի հիւսիս՝ յեղաշրջում տեղի ունեցաւ: Տեսնենք, թէ ով է յաջորդը»,- ըսած է ան:
77-ամեայ Կեզէնը քննադատած է Էրտողանին` իր իշխանութեան դէմ արտայայտուողներու հասցէին կտրուկ արտայայտութիւններու համար: «Ռեճէպ Թայէպ Էրտողան, դուք չէք կրնար փորձարկել մեր հայրենասիրութիւնը, գիտցէք ձեր սահմանները»,- ըսած է ան՝ աւելցնելով, որ ինքը հետեւած է Թուրքիոյ Հանրապետութեան հիմնադիր Մուսթաֆա Քեմալ Աթաթուրքի կողմէ սահմանուած սկզբունքներուն:
Թուրքիոյ մէջ նախագահը վիրաւորելու համար կը պատժուին 1-4 տարուան ազատազրկմամբ: Թուրքիոյ կառավարութիւնը օգտագործած է ընկերայինն լրատուամիջոցներու գրառումները, ծաղրանկարները, լուրերու ռեփորթաժները եւ այլ յօդուածներ՝ մարդոց նախագահը «վիրաւորելու» մէջ մեղադրելու համար: 2014-ին Էրտողանի կողմէ պաշտօնը ստանձնելէ ետք դէպքերու քանակը կտրուկ աճած է:
