26.57c
Երեվան
կրկ, հլս 05
Ախալքալաքի Կարծախի գիւղին մէջ գիշերը յարձակած են պահակի վրայ եւ գոմէն գողացած 32 գլուխ խոշոր եղջերաւոր անասուն: Սահմանապահները կրցած են անասունը վերադարձնել նախքան Թուրքիոյ սահմանը հատելը, սակայն կողոպտիչները յաջողած են թաքնուիլ, կը յայտնէ Jnews-ը:
Թուրքիոյ սահմանակէն Կարծախի գիւղին մէջ աւազակային յարձակումն ու գողութիւնը տեղի ունեցած է ժամը մօտ 1:00-ին: Գոմի պահակ Սարգիս Գասպարեանի խօսքով՝ ինքը հեռախօսով որդիին հետ կը խօսէր, յետոյ աղմուկ եւ շան հաչոցը լսելով՝ բացած է վակոն-տնակի դուռը, ուր կը գիշերէ: Վատ բան զգալով՝ վերադարձած է եւ դուռը փակած: Կողոպտիչները շունը սպաննած էին կրակոցով, յետոյ կոտրած էին վակոնի դուռը եւ ներս մտած:
«Մտան եւ պահանջեցին հեռախօսս: Ես վրացերէն ըսի, որ չեմ տար, իսկ ան թրքերէն ըսաւ՝ ինչպէս չես տար եւ հարուածեց ինքնաձիգի կոթով: Ես հասցուցի հեռախօսս մէկ կողմ նետել: Յետոյ նիւթ մը ցողեցին աչքերուս, մտաւ երկրորդը, եւ սկսան կապկպել թեւերս: Կապեցին պարանով եւ ձեռնաշղթայ հագցուցին, բերանս փակեցին եւ գացին: Անոնք զինուորական համազգեստով էին: Վստահ եմ, որ վրացերէն գիտէին»,- ըսած է Սարգիս Գասպարեանը:
Կողոպտիչներու երթալէն ետք Սարգիս Գասպարեանը դժուարութեամբ քանդած է կապերը, բայց ձեռնաշղթաները մնացած են ձեռքերուն: Ան բացած է դուռը եւ վազած դէպի տիրոջ տուն: Անոր խօսքով՝ սկսած է գլուխով հարուածել պատուհանին՝ մինչեւ մարդիկ արթնցած են:
Գոմի եւ անասունի տէրը՝ Ատոմ Օգմրցեանը, անմիջապէս ոստիկանութեան զանգած է, յետոյ գացած է սահմանապահ ուղեկալ:
«Ինծի ըսին, որ երբ ես 1:43 զանգեցի, անոնք 1:32 արդէն տեսած էին, որ անասուն կը տեղափոխեն: Ըսին, որ 4 մարդ կար: Փոխհրաձգութիւն եղած էր, եւ կողոպտիչները չէին կրցած տանիլ անասունը, բայց փախած էին, սահմանապահները չէին կրցած բռնել անոնց»,- ըսած է Ատոմ Օգմրցեանը:
Ատոմ Օգմրցեանը եւ գիւղացիները վրդոված են: Սա սահմանամերձ գիւղերու մէջ անասունի գողութեան առաջին դէպքը չէ, իսկ Օգմրցեանի համար սա 3-րդ դէպքն է: Առաջին անգամ անվերադարձ գողցած էին նախանցեալ տարի՝ 34 գլուխ, անցեալ տարի 35 գլուխ անասուն գողացած էին, անոնց գտած եւ վերադարձուցած էին: Բոլոր դէպքերու ժամանակ անասունը տարած էին Թուրքիոյ կողմ:
