24.09c
Երեվան
երկ, մյս 04
Կիլիկեան Աթոռի միաբաններէն Տ. Շահէ եպս. Փանոսեան երկրորդ անգամ ըլլալով ընտրուած է Լիբանանի Թեմի Առաջնորդ։
Այս մասին «Արեւելք»ին յայտնի դարձաւ Լիբանանի Հայոց Թեմի Առաջնորդարանի դիմատետրի էջէն։
Յիշեցնենք, որ այս երկրորդ անգամն է, որ Շահէ եպս. կ՚ընտրուի այս պաշտօնին համար։ Սրբազան հայրը առաջին անգամ Առաջնորդ ընտրուած էր 2013 թուականին փոխարինելով Տ. Գեղամ արք. Խաչերեանը, որն աւելի ուշ ընտրուած էր Յունաստանի Թեմի Առաջնորդ։
Այնուհետեւ 2108 թուականին հրաժարած էր իր պաշտօնէն եւ զինք փոխարինած էր Տ. Նարեկ արք. Ալեմեզեանը, որ նոյն պաշտօնը վարեց մինչեւ այս տարուան մարտ ամիսը։
«Արեւելք» յաջողութիւն եւ արեւշատութիւն կը մաղթէ Սրբազան հօր, որ այս պաշտօնը կը ստանձնէ Լիբանանը հարուածող տագնապալի ժամանակահատուածի մը։
Ո՞վ է Տ. Շահէ եպս. Փանոսեանը Կենսագրական հակիրճ տուեալներ
Տ. Շահէ եպս. Փանոսեան ծնած է 1958ին, Քէսապ՝ Սուրիա: Նախնական ուսումը ստացած է Քէսապի Ուսումնասիրաց Միացեալ վարժարանին մէջ:
1971ին ընդունուած է Մեծի Տանն Կիլիկիոյ կաթողիկոսութեան Դպրեվանք, որուն Ժառանգաւորաց բաժինը աւարտելով 1976ին, սարկաւագ ձեռնադրուած է:
1978ին աւարտելով Դպրեվանքը, անդամ դարձած է անոր տեսչութեան կազմին՝ հսկիչի հանգամանքով, միաժամանակ հետեւելով բարձրագոյն ուսման, Մերձաւոր Արեւելքի Աստուածաբանական ճեմարանին մէջ:
1980ին ձեռնադրուած է Աբեղայ: Մինչեւ 1982, վանական պաշտօններու առընթեր, Դպրեվանքէն ներս շարունակած է դասաւանդել հայագիտական նիւթեր:
1982-1986 ծառայած է Յունաստանի թեմին մէջ՝ Թեսաղոնիկէի համայնքին իբրեւ հոգեւոր հովիւ:
1987-1989 ծառայած է Ամերիկայի Միացեալ Նահանգներու Արեւելեան թեմին մէջ, որպէս Ֆլորիտայի Ս. Գրիգոր Լուսաւորիչ եկեղեցւոյ հոգեւոր հովիւ:
1990-1994 եղած է հոգեւոր հովիւ Շիքակոյի Ամենայն Սրբոց եկեղեցւոյ:
1993ին ստացած է Ծայրագոյն վարդապետութեան կարգը:
1995-2002 հովուական պաշտօնով մեկնած է Քանատայի թեմ, ուր որպէս հոգեւոր հովիւ ծառայած է Թորոնթոյի Ս. Աստուածածին եկեղեցւոյ:
2002ին վերադարձած է Մայրավանք եւ մէկ տարուան համար ստանձնած «Թռչնոց Բոյն»ի տեսչութեան պաշտօնը:
2004-2006 դարձեալ Միացեալ Նահանգներու Արեւելեան թեմին մէջ, ծառայած է հովուական պաշտօնով, հոգեւոր հովիւ նշանակուելով Նիւ Ճըրզիի Ս. Վարդանանց եկեղեցւոյ:
2006-2011 ստանձնած է Անթիլիասի Դպրեվանքի Տեսչութեան պաշտօնը:
2008ին եպիսկոպոս ձեռնադրուած է:
2011էն ի վեր Քուէյթի եւ Ծոցի երկիրներու կաթողիկոսական փոխանորդ նշանակուած է Արամ Ա. կաթողիկոսին կողմէ:
