12.09c
Երեվան
շբթ, մյս 16
Պոլիս ապաստանած սուրիացի ներգաղթեալներուն թիւն անցած է կէս միլիոնը, կը գրէ թրքական «Ժումհուրիէթ» պարբերականը` յղում կատարելով երկրի Ներքին գործոց նախարարութեան հրապարակած տուեալներուն:
Ըստ նախարարութեան տրամադրած տեղեկատուութեան, Պոլսոյ մէջ այժմ պաշտօնապէս գրանցուած է 511 հազար 308 սուրիացի ներգաղթեալ, առանց գրանցման կամ փաստաթուղթեր չունեցող փախստականներու տուեալներն այս թիւին մէջ չեն մտներ:
Թուրքիա բնակող սուրիացի ներգաղթեալներու ընդհանուր թիւը հասած է 3 միլիոն 208 հազար 131-ի, ամենաշատ սուրիացի ներգաղթեալները Պոլիս կը գտնուին, երկրորդ տեղը Սուրիոյ սահմանամերձ Ուրֆան է՝ 445 հազար 584 ներգաղթեալով: Ուրֆային կը յաջորդեն կրկին սահմանամերձ Հաթայը (416 հազար 598), Այնթապը (341 հազար 649), Մերսինը (166 հազար 332), Ատանան (165 հազար 28), Քիլիսը (128 հազար 306), այնուհետեւ Թուրքիոյ չորրորդ ամենամեծ քաղաք Պուրսան (123 հազար 376), Յունաստանին սահմանակից եւ երկրորդ ամենամեծ նաւահանգիստն ունեցող Իզմիրը (117 հազար 434) եւ Թուրքիոյ հարաւը գտնուող Մարաշը (95 հազար 431): Նշենք, որ սուրիացի ներգաղթեալները կը կազմեն սահմանամերձ Քիլիսի բնակչութեան 96,5 տոկոսը։
Նշենք նաեւ, որ Հաթայի, Ուրֆայի եւ Այնթապի մէջ, սուրիացիները կը կազմեն բնակչութեան, համապատասխանաբար, 25,19, 22,1 եւ 16,89 տոկոսը։
Ընդհանուր առմամբ, 2016 թուականին Թուրքիա ընդունած է 2 միլիոն 900 հազար փախստական, որոնց մեծ մասը սուրիացի եւ իրաքցի ներգաղթեալներ են: Այսպիսով, Թուրքիա 2016 թուականին դարձած է ամենաշատ փախստականներ ընդունած երկիրը:
