25.4c
Երեվան
հնգ, հլս 30
«Արեւելք», Երեւան.-Հայաստանի Ազգային Գրադարանին մէջ այս առաւօտ ընթացք առաւ ՝ «Հայ մամուլի դերը ազգային արժեհամակարգի ձեւաւորման եւ պահպանման գործում» խորագիրը կրող գիտաժողովը։Այս մասին կը հաղորդէ «Արեւելք»ի Երեւանի թղթակիցը։ Մեր աղբիւրը կը նշէ, որ սոյն գիտաժողովը կը ձօնուի հայ պարբերական մամուլի նախակարապետ համարուող եւ հայ մամուլի երախտաւորներէն ՝ Տ. Յարութիւն քհնյ. Շմաւոնեանի անմնացորդ ճիգերով լոյս տեսած «Ազդարար» թերթի հիմնադրութեան 225-ին («Ազդարար» լոյս տեսած է Հնդկաստանի Մատրաս քաղաքին մէջ)։
Գիտաժողովին բացման խօսքով հանդէս եկան ՀՀ Ազգային Գրադարանի տնօրէն Հրաչեայ Սարիբէկեան, Մայր Աթոռ Սուրբ էջմիածնի Վաչէ եւ Թամար Մանուկեան մատենադարանի տնօրէն Տ. Արարատ քհնյ. Տ. Արարատ քհնյ. Պօղոսեան, ինչպէս նաեւ սոյն գիտաժողովին մասնակցելու համար Երեւան ժամանած Տարօն եւ Զարեհ Տէր Խաչատուրեաններու (որդիները Արտաշէս Տէր Խաչատուրեանին)։
Հարկ է յիշեցնել, որ երկար տարիներ հայ մամուլի մասին ուսումասիրութիւններ կատարած Արտաշէս Տէր Խաչատուրեան կարեւոր դեր ունեցած է հայ մամուլի նախակարապետ համարուող ՝«Ազդարար» հանդէսի պատմական դերին գնահատականը տալու, եւ առհասարակ հայ մամուլի դերի կարեւորութիւնը շեշտելուն գործին մէջ։
Նշենք, նաեւ , որ երախտաշատ Տէր Խաչատուրեանի որդիները ՝ Տարօն եւ Զարեհ այս առթիւ նախաձեռնած են իրենց հօր ՝Արտաշէս Տէր Խաչատուրեանի ունեցած պատմական արժէք ունեցող կարգ մը հատորները նուիրել Հայաստանի Ազգային գրադարանին ու այդ առթիւ գրադարանի տնօրէն Հրաչեայ Սարիբէկեան, որ իր բացման խօսքի ընթացքին այդ մասին նշեց գրադարանի անունով յատուկ շնորհակալագիր մը նուիրեց ՝ Տէր Խաչատուրեան ընտանիքին։
Յիշեցնենք, որ սոյն գիտաժողովին ելոյթներով հանդէս պիտի գան Հայրենի եւ սփիւռքի խումբ մը բանասէրներ, որոնք պիտի անդառանան հայ մամուլի դերին եւ ներկայացնեն հայ մամուլի անցած ճանապարհը, ինչպէս նաեւ տարբեր գաղութներու մէջ հրապարակուող թերթերու կամ հանդէսներու մասին իրենց կատարած աշխատութիւնները։
