23.43c
Երեվան
հնգ, հլս 30
Հայաստանը պատրաստ է վերահաստատելու դիւանագիտական յարաբերութիւնները Թուրքիոյ հետ առանց որեւէ նախապայմանի: «Արմէնբրես»–ի հաղորդմամբ՝ այս մասին նշած է ՀՀ վարչապետ Նիկոլ Փաշինեանը «Corriere della Sera» թերթի հետ հարցազրոյցի ժամանակ՝ պատասխանելով Անգարայի հետ դիւանագիտական յարաբերութիւններու մասին հարցին:
Նիկոլ Փաշինեանն անդրադարձած է Միացեալ Նահանգներու Ներկայացուցիչներու պալատի կողմէ Հայոց ցեղասպանութեան ճանաչման՝ նշելով, որ այն շատ կարեւոր քայլ է: ՀՀ վարչապետը ընդգծած է, որ այն կ'օգնէ կանխել հնարաւոր յետագայ ցեղասպանութիւնները:
«Աւելին, նման որոշումները կը փոխեն մթնոլորտը մեր տարածաշրջանին մէջ: Անոնք ուղերձներ են առ այն, որ նման թշնամական քաղաքականութիւնը ընդունելի չէ միջազգային հանրութեան կողմէ: Դժբախտաբար, ցեղասպանութենէն աւելի քան մէկ դար անց Թուրքիան հայերու կողմէ դեռ կ'ընկալուի որպէս մեր անվտանգութեան համար հնարաւոր սպառնալիք: Մօտ 30 տարի է արդէն, որ մեր սահմանը փակ է՝ թրքական կողմէն, ոչ թէ մեր կողմէն: Հայկական կողմէն այն բաց է»,-նշած է Նիկոլ Փաշինեանը: Ան իր երախտիքը յայտնած է Իտալիոյ Պատգամաւորներու պալատին` Հայոց ցեղասպանութիւնը որպէս այդպիսին ճանչնալու համար: Վարչապետն ընդգծած է, որ կ'աշխատին օտարերկրեայ գործընկերներու հետ նման ճանաչումներ հնարաւորինս շատ ունենալու եւ համաշխարհային ճանաչման հասնելու համար:
