21.09c
Երեվան
հնգ, մյս 07
Լիբանանեան Al Jadeed կայանը Հայաստանի մէջ տեղի ունեցող դէպքերուն մասին կարճ տեսագրութիւն մը ներկայացուցած է: Տեսերիզին մէջ մասնաւորապէս կը յիշուին «Նախախորհրդարան»ի անդամներ Ալեք Ենիգոմշեանն ու Ժիրայր Սէֆիլեանը, նշելով, որ անոնք լիբանանցի են եւ փորձած են միանալ ընդդիմադիր կուսակցութեան մը եւ երկրին մէջ ցոյցեր կատարած ու այդ պատճառով ալ բանտարկուած են: Երկու րոպէ տեւող րէբորթաժին մէջ խօսած են Ժիրայր Սէֆիլեանի եղբայրը՝ Թորոս Սէֆիլեան եւ պէյրութահայ երիտասարդ մը ՝ Գառնիկ Ասֆահանի անունով, որ կ'ըսուի թէ աքթիւ է «հայկական հարցեր»ու առընթեր: Ասֆահանի կը դիտարկէ, թէ իրենք կոչ ուղղած են Լիբանանի մօտ ՀՀ դեսպանին եւ տեղւոյն գաղութի անդամներուն՝ պահանջելով ազատ արձակել Ալեք Ենիգոմշեանը, որ նաեւ ֆիզիքական հարցեր ունի: Ան նաեւ ըսած է, թէ իրենք պիտի «չլռեն այդ անարդար բանտարկութեան համար»: Իր կարգին Թորոս Սէֆիլեան կ'ըսէ, որ Ժիրայր Սէֆիլեան Հայաստանի հպատակութիւն չունի, եւ ան բանտարկուած է Հայաստանի նախագահը քննադատելէ ետք: Նիւթը պատրաստող լրագրողը՝ Լայալ Սաատ, որ 2 անգամներ կապ հաստատած է Լիբանանի մօտ ՀՀ դեսպանին հետ՝ պարզելու համար երկու բանտարկեալներուն հպատակութեան խնդիրը, նոյնիսկ դեսպանին անունը սխալ յիշած է՝ նշելով նախկին դեսպան Աշոտ Քոչարեանին անունը, մինչ ներկայիս Լիբանանի մէջ այդ պաշտօնը կը կատարէ դեսպան ՝ Սամուէլ Մկրտչեան: Լրագրողը, որ առանց նիւթին տիրապետելու հանրութեան հրամցուցած է այս րէբորթաժը, աւելի անհիմն սխալ մը գործելով իր նիւթին համար ընտրած է «Լիբանանի ընդդիմութիւնը Հայաստան հասաւ» անտեղի խորագիրը:
Իր սքանտալային գործելաոճով յայտնի New TV կայանը առաջին անգամը չէ, որ նման մօտեցումներով կը փորձէ հայութեան հարցերուն մօտենալ վիճահարոյց ձեւով, առանց ներկայացնելու լիբանանահայ գաղութի մեծամասնութեան կարծիքը Հայաստանի մէջ տեղի ունեցող գործընթացներուն մասին: Անկախ լրագրութեան հիմունքներով ճամբայ ինկած այս կայանը, սխալ տեղեկութիւններով, անտեղի վերլուծումներով եւ ոչ հայաստանպաստ շահարկումներով միայն վնաս կը բերէ Հայաստանին եւ լիբանանահայութեան:
