Արեվելք - Արևելք լրատուական

401
23/12/2020

Ըստ «Ինթերֆաքս-Ուքրանիա» գործակալութեան Փաշինեան 2020 թուականի աշխարհի ամենաանյաջողակ գործիչն է

«Ինթերֆաքս-Ուքրանիա» լրատուական գործակալութիւնը, հրապարակած է 2020 թուականի անյաջողակ եւ յաղթող քաղաքական գործիչներուն անուանացանկը:

Անոնք իրենց գործողութիւններով եւ որոշումներով որոշած են 2020-ի դժուար ճակատագիրը:

Անյաջողակ գործիչներու ցուցակին մէջ կան Իկոր Տոտոն (Մոլտովիա) Ալեքսանտր Լուկաշենքօ (Պելառուսիա), Էմմանուէլ Մաքրոն (Ֆրանսա), Ուրսուլա ֆոն տեր Լայըն (ԵՄ), Եարոսլաւ Քաչինսքի (Լեհաստան), Միլօ Ճուքանովիչ (Մոնթենեկրօ), Հաշիմ Թաչի (Քոսովո), Բենիամին Նաթանիահու (Իսրայէլ), Խալիֆա Հաֆթար (Լիպիա):

Իսկ այդ անյաջողակներու ցանկի առաջին տեղը գրաւած է Նիկոլ Փաշինեան։ Ըստ գործակալութեան՝ Հայաստանի եւ չճանաչուած Լեռնային Ղարաբաղի հանրապետութեան պարտութիւնը Ատրպէյճանի հետ ռազմական հակամարտութեան, լուրջ ներքաղաքական ճգնաժամի մէջ դրած է պաշտօնական Երեւանը, որու հետեւանքով Նիկոլ Փաշինեանի` իշխանութենէն հեռացումը ժամանակի հարց է եւ ոչ թէ` սկզբունքի: Չի բացառուիր, որ ապագային Փաշինեան ստիպուած ըլլայ դիմել քաղաքական արտագաղթի, խուսափելով քրէական հետապնդումէ, իշխանութիւնը կորսնցնելէն ետք:

Եւ յաջողակ գործիչներու կարգին յայտնուած են, Ռէճէպ Թայէպ Էրտողան (Թուրքիա), Նարենտրա Մոտի (Հնդկաստան), Սի Ցզինփին (Չինաստան), Քամալա Հարիս (ԱՄՆ), Վիքթոր Օրպան (Հունկարիա), Սատիր Ժափարով (Խրխզիստան), Ինկրիթա Շիմոնիթէ (Լիթուանիա), Մայա Սանտու (Մոլտովիա), Իլհամ Ալիեւ (Ատրպէյճան) եւ Լուիս Արսէ (Պոլիվիա):

Լուրը՝ «Նիւզ.ամ»էն