22.09c
Երեվան
կրկ, մյս 17
ՀՀ պաշտպանութեան նախկին նախարար Դաւիթ Տօնոյեանի փաստաբանական խումբը յայտարարութիւն տարածած է, որուն մէջ կ'ըսուի․ «Կը շարունակենք պնդել, որ Դաւիթ Տօնոյեանը խտրական կերպով պահւում է կալանքի տակ: Դատական նիստերի դռնփակ լինելուն աւելացել է նաեւ տարբեր տեխնիկական պատճառներով այդ նիստերի անցկացումը 2 ամիսը մէկ անգամ:
Աւելին, յաջորդ դատական նիստը նշանակուել է 2022 թուականի Մայիսի 2-ին: Փաստացի 3 ամիս է` դատարանը անգործութեան է մատնուած: Սա գնահատում ենք որպէս հոգեբանական խոշտանգում եւ պատժի գործադրում կալանաւորուած անձանց նկատմամբ, որի վերաբերեալ Դ. Տօնոյեանը յայտարարել է նաեւ ՀՀ Վերաքննիչ քրէական դատարանում` միաժամանակ պահանջելով հրապարակային քննութիւն:
Նիստը նախագահող դատաւոր Մնացական Յարութիւնեանի այն հարցին, թէ որն է, ըստ նրա, դատական նիստերը դռնփակ անցկացնելու նպատակը, Դաւիթ Տօնոյեանը պատասխանել է` որպէսզի հանրութիւնը չտեսնի առաջադրուած մեղադրանքների սին լինելը:
Դ. Տօնոյեանը Վերաքննիչ դատարանում յայտարարել է նաեւ, որ հրթիռների ձեռքբերման վերաբերեալ ճիշդ որոշում է կայացրել, որն այդ փուլում նպաստել է ՀՀ զինուած ուժերի կարողութիւնների բարձրացմանը, որի վառ ապացոյցն է այն, որ ի հեճուկս այն յայտարարութիւններին, թէ իբր ձեռք բերուած հրթիռները չեն կիրառուել 44-օրեայ պատերազմի ժամանակ եւ ուսումնավարժական պատրաստման ընթացքում, քրէական գործով ձեռք բերուած ապացոյցներով պարզուել եւ հիմնաւորուել է հակառակը:
Մէկ այլ կարեւոր հանգամանք, որն իրական սպառնալիք է ՀՀ Զինուած ուժերի համալրման եւ մարտունակութեան բարձրացման համար. համապատասխան քայլեր չեն ձեռնարկւում խնդրոյ առարկայ զինամթերքի յետագայ շահագործումը ապահովելու, դրա պահպանման միջոցառումներն ապահովելու նպատակով, քանի որ զինամթերքի շահագործման վրայ արգելք է դրուած»:
