Պէյրութի եւ շրջակայ արուարձաններու աղբի խնդիրը կը մնայ անլոյծ: Մինչ քաղաքացիական խմբաւորումներ մայրաքաղաքի տարբեր մայրուղիները կը փակեն անդին կառավարութիւնը ճիգեր կ'իրականացնէ աղբահանութեան խնդրին լուծում մը տալու նպատակով: Նշենք, որ քաղաքացիական միաւորումներ դժգոհ են կառավարութեան որդեգրած լուծումներու փաթեթէն եւ այդ լուծումները կը համարեն անընդունելի ու վնասակար: Երէկ երեկոյեան համացանցի ճամբով տարածուեցան լուսանակարներ, ուր յստակօրէն կ'երեւի պատասխանատու մարմիններուն անճարակութիւնը: Մարմինները յարմար նկատած են Պէյրութի տարբեր շրջաններուն մէջ կուտակուած «մեծաքանակ» աղբերը լեցընել Քարանթինա շրջանին մէջ գտնուող բացօթեայ կառատան մը մէջ ինչպէս նաեւ Պէյրութի «չորցած» գետին հունին մէջ: Այսօր վարչապետ Սալամի կառավարութիւնը արտակարգ նիստ պիտի կայացնէ այս խնդրին լուծումներ որոնելու համար: Միաժամանակ կը սպասուի, որ քաղաքացիական աքթիւիսթներ նոյն ժամերուն իրենց բողոքի ցոյցերը սաստկացնեն: Տակաւին կը խօսուի, որ աղբի տագնապը կրնայ ներսէն «պայթեցնել» կառավարութիւնը:Տխուր փաստ է Լիբանանի համայնքային երկիր ըլլալու իրականութիւնը: Տխուր է նաեւ, որ նոյնիսկ տարրական աղբահանութեան խնդիրը դարձած է սակարկութեան թեմա: Լիբանանցի քաղաքացիին ձայնը լսող չկայ: Կրնայ ամբողջ Պէյրութը աղբի տակ «թաղուիլ» միայն, թէ համայնքներուն ու անոնց շուրջ գործող «ագարակներուն» շահերը չտուժեն: