Լիբանան- Պէյրութի հայահոծ Նոր Հաճըն թաղամասին մէջ գործող Կէրթմէնեան նախակրթարանը փակած է իր դռները: «Արեւելք» այս մասին տեղեկութիւնը ստացաւ Կէրթմէնեան վարժարանի մէջ պաշտօնավարող եւ ներկայիս անգործ մնացած ուսուցչուհիէ մը: Մեր աղբիւրը նաեւ ըսաւ, որ անցեալ տարի դպրոցը ունեցած է 100 աշակերտ եւ հոն պաշտօնավարած են 15 ուսուցիչներ: Մեր աղբիւրին ըսելով Կէրթմէնեան վարժարանի փակման հիմնական դրդապատճառը տնտեսական տագնապն է, որ կը հարուածէ ամբողջ Լիբանանը: Կը հաղորդուի նաեւ, որ դպրոցի շէնքը կը մնայ փակ եւ շէնքին վերաբերեալ որեւէ ծրագրի մասին տեղեկութիւններ չեն փոխանցուիր: Սփիւռքի հայութեան սրտին ՝ Պէյրութի մէջ գործող այս վարժարանի աշակերտերը հիմնականին մէջ կը պատկանէին չքաւոր ընտանիքներու: