4.09c
Երեվան
ուրբ, փտր 27
«Վերջին օրերին կրկին թեժացել է Ստեփանակերտի Վերածննդի հրապարակում համերգի կազմակերպման հարցը՝ վերստին հասարակութիւնը բաժանելով երկու մասի: Կ'ուզէի մի քանի կէտով անդրադառնալ այդ հարցին»: Այս մասին Արցախի պետական նախարար՝ Արտակ Բեգլարեան Դիմատետրի իր էջին վրայ գրառում ըրած է, ուր մասնաւորապէս ըսած է․-
«Նախ երբ ես նշանակուեցի պետական նախարար, դեռեւս Յունիսին ընդհանուր կանոնը քննարկեցինք ԿԳՄՍ նախարար՝ Լուսինէ Ղարախանեանի հետ, եւ ես նրան ցուցում տուեցի, որ առնուազն մինչեւ Նոյեմբերի 11-ը Վերածննդի հրապարակում որեւէ համերգ չկազմակերպուի ու չթոյլատրուի՝ անկախ դրա բնոյթից, հեղինակից ու բովանդակութիւնից: Այդ որոշման նպատակն այն է, որ քանի դեռ 2020 թուականի պատերազմի զոհերի տարին չի լրացել, մենք խոշորամաշտապ համերգային միջոցառումներ չպէտք է կազմակերպենք՝ հաշուի առնելով հասարակութեան մէջ ընդունուած բարոյական կանոններն ու արժէքները»,- գրած է ան:
«Այս որոշումը կայացրել ենք ոչ միայն այն պատճառով, որ մենք էլ ենք այդպէս կարծում, այլեւ յատկապէս այն նպատակով, որ կանխենք հասարակութեան մէջ երկպառակտում խթանող միջադէպերն ու վէճերը» ապա պարզաբանած, թէ այս զգայուն իրավիճակին հանրային համերաշխութեան երաշխաւորումը մեր հիմնական նպատակն է: «Այդ մօտեցումը տեղին ու բարոյական է յատկապէս այն պայմաններում, որ դրան ընդգծուած կողմ են մեր զոհուած հերոսների բազմաթիւ հարազատներ ու այլ քաղաքացիներ, եւ մենք իրաւունք չունենք դէմ գնալ նրանց յոյզերին:
Միանշանակ է, որ Զոհերի յիշատակը յարգում են պատշաճ գործողութիւններով, ոչ թէ՝ անգործութեամբ, եւ իւրաքանչիւր անձ պատասխանատու է իր վարքի համար: Այո, կան բազմաթիւ դրական ու բացասական դրսեւորումներ մասնաւոր կեանքում, սակայն պետութիւնը, որպէս հանրային կեանքի գլխաւոր դերակատար ու կարգաւորող, պարտաւոր է ցուցաբերել որոշակի զսպուածութիւն՝ մեր հասարակութեան արժէքներին համապատասխան:
Անդրադառնալով Անտրէի համերգի թեմային՝ ասեմ, որ գլխաւոր խնդիրը ոչ արդիւնաւէտ հաղորդակցութիւնն էր լիազօր մարմինների հետ: Մասնաւորապէս, տուեալ հարցով զբաղուել է մշակոյթի ոլորտում որեւէ լիազօրութիւն չունեցող պաշտօնատար անձ ու մարմին, եւ ԿԳՄՍ նախարարն ու ես ծրագրուած համերգի մասին տեղեկացել ենք յայտարարութեան տարածումից օրեր անց՝ Օգոստոսի 5-ին»,- նշած է ան ու շարունակած, որ «Ես նոյն օրը զանգահարել եմ Անտրէին, հարցը քննարկել նրա հետ ու առաջարկել համերգը տեղափոխել Ստեփանակերտի մշակոյթի ու երիտասարդութեան պալատ: Եւ այդ նոյն առաջարկը կ'անէի, եթէ Անտրէի փոխարէն մէկ այլ (ներառեալ՝ աշխարհահռչակ) մշակութային գործիչ լինէր:
Այս երկու օրը ծաւալուած հանրային քննարկումների ընթացքում հնչել են բազմաթիւ վիրաւորական արտայայտութիւններ տարբեր անձանց հանդէպ, ինչի առթիւ կ'ուզէի յորդորել բոլորին զերծ մնալ որեւէ մէկի արժանապատուութիւնը վիրաւորելուց եւ հանրային հաղորդակցութիւնը պահել բարձր բարոյական մակարդակում: Անկախ կարծիքների տարբերութիւնից՝ պէտք է յարգել դիմացինի կարծիքը»,- գրած է ան ու աւելցուցած «Համոզուած եմ, որ շատերի կողմից սիրուած Անտրէն որեւէ նպատակ չի ունեցել անյարգալից կերպով վերաբերուելու զոհերի հարազատներին, ընդհակառակը՝ որոշել է իր ներկայութեամբ ու արուեստով սատար կանգնել իր հայրենակիցներին:
Յ.Գ. Ամէն դէպքում, կարծում եմ, մշակութային զուսպ միջոցառումները աւելի քան անհրաժեշտ են այս իրավիճակում, որպէսզի հնարաւոր լինի հոգեւոր սննդի միջոցով գոնէ որոշ չափով մեղմել մեր ժողովրդի ցաւերը եւ մղել արարման, ստեղծագործման ու կեանքի շարունակման: Այդ անհրաժեշտութիւնն առկայ է առաջնահերթօրէն հենց զոհերի հարազատների համար»,- եզրափակած է նախարարը:
