-1.91c
Երեվան
երկ, հնվ 13
Իսրայէլը ռազմական գործողութիւն կ՚իրականացնէ Ռաֆահի մէջ՝ հսկողութիւն սահմանելով Կազայի սահմանային անցակէտի վրայ, որ շրջափակուած գօտի մարդասիրական օգնութիւն հասցնելու հիմնական ուղին է։
Ռազմական գործողութիւնները սկսած են երկուշաբթի՝ 6 մայիսի ուշ երեկոյեան, երբ հրէական պետութեան կառավարութիւնը յայտարարած է, որ հրադադարի առաջարկը չի համապատասխաներ Իսրայէլի պահանջներուն:
Ամիսներ շարունակ վարչապետ Բենիամին Նաթանիահուն ըսած է, որ Իսրայէլի պաշտպանութեան բանակը Ռաֆահի մէջ «Համաս»-ի «վերջին յենակէտերը» ոչնչացնելու գործողութիւն կ՚իրականացնէ՝ անկախ անկէ, համաձայնութիւն ձեռք կը բերուի՞ պատանդներու հետ կապուած բանակցութիւններուն, թէ՞ ոչ։ Իսրայէլի բանակն ալ յայտնած է, որ Եգիպտոսի սահմանամերձ քաղաքին մէջ կը գտնուին «Համաս»-ի վեց գումարտակներէն չորսը, ինչպէս նաեւ խումբի ղեկավարութեան անդամները եւ զգալի թիւով պատանդներ, որոնց առեւանգած էին հոկտեմբեր 7-ին Իսրայէլի վրայ յարձակման ժամանակ:
ԱՄՆ արտաքին գործոց նախարարութիւնը յայտարարած է, որ Իսրայէլի պաշտպանութեան բանակը Ռաֆահի մէջ կ՚իրականացնէ ոչ թէ լայնամաշտապ ներխուժում, այլ «սահմանափակ» գործողութիւն: Միաժամանակ Ճօ Պայտընի վարչակազմը հաստատած է լրատուամիջոցներու հաղորդագրութիւններն այն մասին, որ անցեալ շաբաթ Սպիտակ տունը դադրեցուցած է օդային ռումբերու մատակարարումը Իսրայէլին՝ մտավախութիւն ունենալով, որ ատոնք «կ՚օգտագործուին Ռաֆահի մէջ գործողութեան ժամանակ»։
Հոկտեմբեր 7-էն ի վեր սա առաջին դէպքն է, երբ ԱՄՆ-ն կը յետաձգէ Իսրայէլի համար նախատեսուած զէնքի առաքումը։
