8.09c
Երեվան
հնգ, մրտ 12
Վարչապետ Նիկոլ Փաշինեան յայտարարած է, որ իր ցուցումով Հայոց ցեղասպանութեան թանգարան-հիմնարկի տնօրէն Էդիտա Գզոյեանն ազատման դիմում գրած է։ Ըստ Փաշինեանի՝ Գզոյեանի Վենսին Արցախի մասին գիրք նուիրելը «կը հակասէ Հայաստանի կառավարութեան արտաքին քաղաքականութեան եւ սադրիչ գործողութիւն է»։
Փետրուար 10-ին պաշտօնական այցով Հայաստան ժամանած ԱՄՆ փոխնախագահ Ճէյ Տի Վենսն այցելած էր Հայոց ցեղասպանութեան յուշահամալիր: Փոխնախագահին ուղեկցած էր թանգարան-հիմնարկի տնօրէն Էդիտա Գզոյեանը եւ Վենսին Արցախի հիմնախնդրի մասին գիրք փոխանցած էր։
Գզոյեանն ԱՄՆ փոխնախագահին ներկայացուցած էր նաեւ Ծիծեռնակաբերդի տարածքին մէջ անցեալ դարավերջին Ատրպէյճանի Սումկայիթ, Կիրովապատ (Գանձակ), Պաքու քաղաքներուն մէջ ատրպէյճանական կառավարութեան կազմակերպած կոտորածներուն զոհ գացած հայերու յիշատակին տեղադրուած երեք խաչքարերու եւ Արցախեան գոյամարտի տարիներուն Յուշապատի դիմացի հատուածին մէջ յուղարկաւորուած հինգ ազատամարտիկներու պատմութիւնները՝ շեշտելով կապը տեղի ունեցածի եւ Հայոց ցեղասպանութեան միջեւ:
Մարտ 12-ին կառավարութեան մէջ ճեպազրոյցի ժամանակ վարչապետ Նիկոլ Փաշինեանը յայտարարած է, որ Էդիտա Գզոյեանի քայլը համարած է Հայաստանի կառավարութեան արտաքին քաղաքականութեան հակառակ գործողութիւն եւ սադրիչ գործողութիւն։
«Երբ երկրի վարչապետն ասում է Ղարաբաղեան շարժում չկայ, ինչ է նշանակում օտարերկրեայ հիւրին Արցախեան հիմնահարցի վերաբերեալ գիրք նուիրել։ Այս երկրում քանի՞ հոգի կարող է արտաքին քաղաքականութիւն վարել։ Հայաստանի Հանրապետութիւնում արտաքին քաղաքականութիւն վարում է Հայաստանի կառավարութիւնը։ Ես կառավարութեան ղեկավարն եմ, եւ այդ թւում ես եմ վարում արտաքին քաղաքականութիւնը։ Եւ այն պետական պաշտօնեան, որը Հայաստանի կառավարութեան վարած արտաքին քաղաքականութեանը հակասող բան կ՚ասի՝ կ՚ազատուի աշխատանքից, այդտեղ ի՞նչ թեմայ կայ։ Մենք պետութի՞ւն ենք, թէ՞ սա ինքնագործ խմբակ է, որտեղ մեր ստեղծագործական պոտենցիալն ենք փորձարկում։ Սա պետութիւն է, յարգելինե՛րս»,-ըսած է վարչապետը։
Նշենք, որ նախօրէին յայտնի դարձաւ, որ Էդիտա Գզոյեանն աշխատանքէն ազատման դիմում գրած է, սակայն իրաւական ակտ չկայ։
