13.09c
Երեվան
չրք, հնս 25
Իտալիոյ մայրաքաղաք Հռոմի մէջ մեկնարկած է ԱՄՆ-ի եւ Իրանի միջեւ Թեհրանի միջուկային ծրագրի շուրջ ստեղծուած ճգնաժամի կարգաւորման բանակցութիւններու երկրորդ փուլը, յայտնած է Իրանի պետական հեռարձակողը (IRIB):
Բանակցութիւնները կը կայանան Օմանի դեսպանի նստավայրին մէջ։
Աւելի վաղ Իրանի արտաքին գործոց նախարարութեան պաշտօնական ներկայացուցիչ Էսմայիլ Պաղային յայտնած էր, որ Իտալիոյ մայրաքաղաքին մէջ անուղղակի բանակցութիւններ պիտի կայանան Օմանի արտաքին գործոց նախարար Պատր ալ-Պուսաիտիի միջնորդութեամբ։
Երկու կողմերը պիտի քննարկեն Իսլամական Հանրապետութեան քաղաքացիական միջուկային ծրագիրը եւ այդ երկրի դէմ ամերիկեան պատժամիջոցներու դադրեցումը։ Այս մասին գրած է IRNA գործակալութիւնը։
Իրանի ԱԳՆ պաշտօնական ներկայացուցիչ Էսմայիլ Պաղային նշած էր, որ բանակցութիւններու առաջիկայ փուլը պիտի չյանգեցնէ տարաձայնութիւններու վերջնական կարգաւորման:
«Մենք կը հասկնանք, որ սա հարթ ճանապարհ չէ, բայց ամէն քայլ կ՚ընենք բաց աչքերով՝ յենուելով անցեալի փորձի վրայ»,-գրած է դիւանագէտը X-ի էջին:
Աւելի վաղ յայտնած էին, որ Իրանի ԱԳ նախարարը ժամանած է Հռոմ՝ ԱՄՆ-ի հետ բանակցութիւններու։
Ապրիլ 12-ին Մասքաթո մէջ Օմանի միջնորդութեամբ տեղի ունեցած էր անուղղակի բանակցութիւններու առաջին փուլը, որուն Իրանի պատուիրակութիւնը գլխաւորած էր արտաքին գործոց նախարար Ապպաս Արաքչին, իսկ ամերիկեան պատուիրակութիւնը՝ նախագահի յատուկ բանագնաց Սթիւըն Ուիթքոֆը։
