20.09c
Երեվան
երք, սպտ 01
Օրերս, Պէյրութի Հայկազեան համալսարանի նախագահ՝ Վեր. Փօլ Հայտոսթեան այցելած է Նիւ Ճըրսիի Փարամըս շրջանի Հայ Երիցական եկեղեցին (APC) եւ ելոյթ ունեցած է «Հայկազեան համալսարանի առաքելութիւնն ու նախաձեռնող դերը Լիբանանի հայ կեանքի ներկայ մարտահրաւէրներու լոյսին ներքոյ» թեմայով։
Այս մասին «Արեւելք» տեղեկութիւն ստացաւ ԱՀԱԸ-ի դիմատետրի էջէն։
Աղբիւրը նաեւ կը նշէ, որ այդ իւրայատուկ հանդիպման ընթացքին բացման խօսքով հանդէս եկած է Հայ Երիցական եկեղեցւոյ պատասխանատու Վեր. Ժոզէֆ Կարապետեա, եւ խօսքեր արտասանած են Ամերիկայի Հայ Աւետարանչական Ընկերակցութեան (ԱՀԱԸ-AMMA) խորհուրդի անդամ, Հայկազեան համալսարանի շրջանաւարտ՝ Սերժ Պչաքճեան։
Իր հերթին ԱՀԱԸ-ի խորհուրդի անդամ, դոկտ. Միքայէլ Ոսկեան պատմած է «Հայկազեան համալսարանի եւ ԱՀԱԸ-ի գեղեցիկ եւ միահիւսուած յարաբերութիւններուն մասին»: Ան նշած է, թէ ինչպէս Մերձաւոր Արեւելքի մէջ Հայ Աւետարանական Եկեղեցիներու Միութիւնը եւ ԱՀԱԸ-ն նիւթապէս նպաստած են համալսարանին, որպէսզի հայ եւ տեղացի ուսանողներ կրթութիւն ստանան:
Կը նշուի նաեւ, որ Դոկտ. Ոսկեան, որպէս ԱՀԱԸ-ի ներդրումային կոմիտէի նախագահ կը ղեկավարէ Հայկազեան համալսարանի նուիրատուութեան հիմնադրամը, որ բոլոր կատարուած նուիրատուութիւնները ուղղակի կ'ուղարկէ Հայկազեան համալսարան:
Մեր ընթերցողներուն յիշեցնենք, որ Վեր. Փօլ Հայտոսթեանի բարձր եւ անմնացորդ ճիգերով ղեկավարուող Հայկազեան համալսարանը հիմնադրուած է 1955-ին, ԵՒ ԱՅՆ սփիւռքի միակ հայկական բարձրագոյն ուսման հաստատութիւնն է:
