11.09c
Երեվան
շբթ, փտր 21
«Այլընտրանքային նախագիծեր խումբ»ի անդամներ Վահէ Յովհաննիսեանը, Էլինար Վարդանեանը, Ստեփան Մարգարեանը եւ Գեղամ Նազարեանը հանդէս եկած են յայտարարութեամբ, որուն մէջ ըսուած է․
«Մեր ունեցած տեղեկութիւններով՝ այսօր առաւօտեան հերթական կեղծ մեղադրանքով ՅՔԾ է կանչուել Արմէն Գէորգեանը։ Սա տեղի է ունեցել Արմէն Գէորգեանի՝ «Հայաստան» դաշինքի շտաբի պետ նշանակուելու որոշումից անմիջապէս յետոյ։ Աբսուրդը (անհեթեթութիւնը) ոչ միայն բուն՝ ակնյայտ քաղաքական հետապնդման մէջ է, այլեւ այն բանի, որ այս պահին, երբ երկիրը կանգնած է նոր «նոյեմբերեան» փաստաթղթի եւ սահմանային բախումների մեծ վտանգի առջեւ, այս իշխանութեան գործունէութեան միակ նպատակը եւ իմաստը դարձեալ քրգործերի յարուցումն է։ Երկիրը նորից պատերազմի շեմին է, տարածքային կորուստների շեմին է, կուլիսներում ստորագրուող փաստաթղթերի շեմին է, սոցցանցերը ողողուած են մեր զինուժի ստորացման կադրերով, եւ նոյնիսկ նման պահերին քաղաքական իշխանութիւնը հրահանգներ է տալիս՝ քրէական հետապնդման, նոր գործերի, քննչական մարմինները շարունակում են հնազանդօրէն կատարել այս քաղաքական իշխանութեան պատուէրները, քննչական ողջ համակարգն անգամ այս պայմաններում պատանդի պէս կատարում է քաղաքական հրահանգներ։
Խնդիրը մասնաւոր չէ, Արմէն Գէորգեանի անձի մէջ չէ խնդիրը, թէեւ, նրանից սկսած, բոլորս պէտք է փոխենք երկրում առկայ խաղի կանոնը եւ մթնոլորտը։ Իներտ (անգործ), դիտորդական պահուածքից պէտք է անցում անել աւելի յստակ քայլերի։ Անել դա փողոցում, թէ քաղաքական գործիքներով՝ որոշման հարց է, բայց միանշանակ է, որ դա պէտք է արուի։ Սա վերաբերում է բոլորին՝ սկսած «Հայաստան» Դաշինքից, մինչեւ միւս իրական ընդդիմադիր ուժեր, քաղաքացիական հասարակութիւն, պարզապէս քաղաքացիներ։
Այսօր պարտութեան դէմքը նոյն ոճով շարունակում է ղեկավարել երկիրը. սա նշանակում է, որ հետեւանքներն էլ լինելու են նոյնը։
Վստահ ենք, որ կայ անհրաժեշտութիւն.
1. Խստիւ զգուշացնել պետական համակարգին, իրաւապահներին, որ ապօրինի գործունէութիւնը անհետեւանք չի լինելու, ապօրինի հրահանգների կատարումը նոր իշխանութեան ձեւաւորումից յետոյ խստօրէն պատժուելու է։ Անհատապէս՝ պատժուելու են։
2. Անյապաղ սկսել խորհրդակցութիւններ, հանրային լայն համախմբման գործընթաց՝ փոխելու համար ուրուագծուող նոր զարգացումների ընթացքը։ Համախմբում՝ իրական ուժերի, իրական շրջանակների, իրական անհատների, եւ ոչ թէ՝ անարդիւնաւէտ ֆորմատներով (ձեւաչափերով)»։
