27.09c
Երեվան
ուրբ, հնս 27
«Աստուծոյ սուրբ ժողովուրդի իւրաքանչիւր հայ կաթողիկէ զաւակ կը սպասէր իր հովիւին, որպէսզի անկէ ճանչցուի, կոչուի իր անունով եւ առաջնորդուի Աւետարանի զօրեղ եւ հեզ խօսքով»:
Կաթողիկէ աշխարհի Քահանայապետ, Հռոմի Ֆրանչիսկոս պապը հանդիպում ունեցաւ Տանն Կիլիկիոյ կաթողիկէ հայոց նորընտիր կաթողիկոս պատրիարք Ռաֆայէլ Պետրոս ԻԱ.-ին ու անոր ընկերացող Հայ կաթողիկէ եկեղեցւոյ սիւնհոդոսական հայրերուն հետ:
Հանդիպումին ընթացքին Ֆրանչիսկոս պապը նորընտիր պատրիարքին յանձնեց «Եկեղեցական հաղորդութեան» վաւերագիրը, որուն մէջ պապը կը յայտնէ, թէ «ինք եւս կը միանայ եկեղեցւոյ ուրախութեան` պատրիարքի ընտրութեան համար»` նշելով, որ «Աստուծոյ սուրբ ժողովուրդի իւրաքանչիւր հայ կաթողիկէ զաւակ կը սպասէր իր հովիւին, որպէսզի անկէ ճանչցուի, կոչուի իր անունով եւ առաջնորդուի Աւետարանի զօրեղ եւ հեզ խօսքով»:
Վաւերագիրին մէջ գրուած է, որ սրբազան քահանայապետը կը հաստատէ, որ ինք լաւապէս կը ճանչնայ հայ ժողովուրդը` իբրեւ «տառապելու մէջ» մասնագէտ, «անոր քրիստոնէական 1700 տարիներէ աւելի պատմութեան ժամանակ կրած փորձանքներուն համար ու նաեւ անոր անսպառ կարողութեան համար` վերածաղկելու եւ պտուղ տալու, իր սուրբերուն եւ նահատակներուն սրբութեան ու իմաստութեան միջոցով, իր վարդապետներու եւ մտաւորականներու մշակոյթին միջոցով, իր արուեստին միջոցով, որ գիտէ ժայռին մէջ քանդակել խաչը` իբրեւ կեանքի ծառ, որ վկայութիւն է հաւատքի յաղթանակին, աշխարհի որեւէ հակառակ ուժի վրայ»:
