1.09c
Երեվան
հնգ, փտր 12
Թուրքիոյ նախագահ Ռեճեպ Թայիպ Էրտողան ըսած է, որ «եթէ Հայաստանը վճռական մնայ երկու երկիրներու յատուկ բանագնացներու նախաձեռնած գործընթացը յառաջ մղելու հարցով, ապա Թուրքիոյ կողմէ փակ սահմանները պահպանելու անհրաժեշտութիւն չ'ըլլար»:
Թուրքիոյ նախագահը ըսած է, որ Սենեկալի մէջ Գերմանիոյ նախագահ Ֆրանք-Վալթըր Շթայնմայըրի հետ հանդիպման շօշափուած է հայ-թրքական յարաբերութիւններու կարգաւորման հարցը:
«Ես արդէն ըսած եմ, որ Անգարան պատրաստ է փոխադարձ քայլերու ձեռնարկելու ի պատասխան Հայաստանի ցանկացած դրական նախաձեռնութեան: Այս տարածաշրջանը խաղաղութեան եւ կայունութեան կարիքն ունի, եւ այդ պատճառով թրքական իշխանութիւնները անկեղծ քայլերու ձեռնարկած են` սկսելու կարգաւորման գործընթացը: Այս գործընթացը օգտակար կը համարէ նաեւ իմ եղբայր Իլհամը», ըսած է Էրտողանը:
Խօսելով Վիեննայի մէջ կայանալիք Թուրքիոյ եւ Հայաստանի յատուկ բանագնացներու հանդիպման մասին` Թուրքիոյ նախագահը ըսած է.
«Մենք տեղեկացուած ենք Հայաստանի շարք մը ակնկալիքներուն մասին` կապուած սահմանի բացման եւ դիւանագիտական յարաբերութիւններու հաստատման հետ: Եթէ Հայաստանը վճռական մնայ յատուկ բանագնացներու նախաձեռնած գործընթացը յառաջ մղելու հարցով, ապա Թուրքիոյ կողմէ փակ սահմանները պահպանելու անհրաժեշտութիւն չ'ըլլար: Փետրուարի սկիզբը վերսկսան Սթամպուլ-երեւան թռիչքները: Մենք կ'ակնկալենք Երեւանէն դրական մօտեցման պահպանում»:
Էրտողան ընդգծած է, որ Ատրպէյճանի եւ Հայաստանի յարաբերութիւններու հարցը սերտօրէն կապուած է Անգարայի եւ Երեւանի միջեւ յարաբերութիւններու կարգաւորման հետ: «Բոլոր կողմերը պէտք է օգտագործեն տարածաշրջանային համագործակցութեան պատմական հնարաւորութիւնը: Թուրքիան կը շարունակէ սերտօրէն աշխատիլ Ատրպէյճանի հետ այդ հարցերուն շուրջ», յաւելած է Թուրքիոյ նախագահը:
