26.09c
Երեվան
չրք, հնս 25
Հայաստանը իր հերթին կը շարունակէ վերահաստատել իր հաւատարմութիւնը խաղաղութեան օրակարգին, եւ պաշտօնական Պաքուին կոչ կ'ընէ՝ ձեռնպահ մնալու խաղաղութիւն հաստատելու պատմական հնարաւորութիւնը զէրոյացնելուն ուղղուած քայլերէն: Այս մասին այսօր՝ 11 օգոստոսին, Կառավարութեան հերթական նիստին յայտարարած է ՀՀ վարչապետ Նիկոլ Փաշինեանը:
«Լեռնային Ղարաբաղում ստեղծուած իրավիճակի լաւագոյն լուծումը Ադրբեջանի կողմից Լաչինի միջանցքի ապօրինի արգելափակման վերացումն է, Ստեփանակերտ-Բաքու երկխօսութեան մեկնարկը միջազգային մեխանիզմի շրջանակներում: Հայաստանն իր հերթին շարունակում է վերահաստատել իր հաւատարմութիւնը խաղաղութեան օրակարգին եւ պաշտօնական Բաքուին կոչ է անում՝ ձեռնպահ մնալ խաղաղութիւն հաստատելու պատմական հնարաւորութիւնը զրոյացնելուն ուղղուած քայլերից»,- նշած է Փաշինեանը:
Փաշինեանի խօսքով՝ Լեռնային Ղարաբաղի մէջ մարդասիրական ճգնաժամը կը շարունակէ խորանալ ու ծաւալիլ.
«2022 թուականի դեկտեմբերից Ադրբեջանը Լաչինի միջանցքը ապօրինի արգելափակման միջոցով արգելել էր կոմերցիոն մատակարարումները դէպի Լեռնային Ղարաբաղ, այսինքն՝ Լեռնային Ղարաբաղում գործող խանութները, դեղատները 2022 թուականի դեկտեմբերից իրենց վաճառքի տեսականու արտաքին մատակարարում ընդհանրապէս չեն ունեցել: 2023 թուականի յունիսի 15-ից Ադրբեջանն արգելափակել է նաեւ դէպի Լեռնային Ղարաբաղ հումանիտար բեռների, այդ թուում՝ մանկական սննդի եւ դեղորայքի մատակարարումները, այդ թուում՝ Կարմիր խաչի միջոցով: Հումանիտար ճգնաժամի պայմաններում Լեռնային Ղարաբաղի ժողովրդին աջակցութեան ՀՀ կառավարական յանձնաժողովը դեռեւս սոյն թուականի յուլիսի 26-ին դէպի Լեռնային Ղարաբաղ հումանիտար բեռներ ուղարկելու որոշում էր կայացրել եւ դէպի Լեռնային Ղարաբաղ ուղեւորուած 19 բեռնատար ավտոմեքենաները շարունակում են կանգնած մնալ Սիւնիքի մարզի Կոռնիձորի հատուածում՝ Լաչինի միջանցքի մօտ:
Եթէ մի պահ Ադրբեջանի այս գործելակերպը հումանիտար բեռների մուտքը Լեռնային Ղարաբաղ արգելափակելու չդիտարկենք ԼՂ հայութեան ցեղասպանութեան ենթարկելու Ադրբեջանի բացայայտ քաղաքականութեան համատեքսում, այսինքն՝ չկայ բացատրութիւն, եթէ այս հանգամանքը մի կողմ դնենք»:
Նիկոլ Փաշինեանը ըսած է, որ Լեռնային Ղարաբաղ մարդասիրական բեռերու մուտքի արգելքը առաւել հաւաստի կը դարձնեն ԼՂ հայերը ցեղասպանութեան ենթարկելու Ատրպէյճանի կողմէ վարուող քաղաքականութեան մասին յայտարարութիւնները:
«Միջազգային փորձագիտական շրջանակներից հնչում են կարծիքներ, որ Լաչինի միջանցքի՝ ապօրինի արգելափակման հետեւանքով Լեռնային Ղարաբաղում հումանիտար ճգնաժամ յարուցելու Ադրբեջանի քաղաքականութիւնը կարող է դիտարկուել ցեղասպանութեան յանցագործութիւնը կանխելու եւ դրա համար պատժի մասին ՄԱԿ-ի 1948 թուականի դեկտեմբերի 9-ի կոնվենցիայի դիտանկիւնից: Կարծում եմ՝ Լաչինի միջանցքի ապօրինի արգելափակման հետեւանքով Լեռնային Ղարաբաղում առաջացած հումանիտար ճգնաժամը ծաւալուել է այն աստիճանի, որ պէտք է աւելի մեծ ջանքեր գործադրել ստեղծուած իրավիճակին միջազգային իրաւական գնահատական տալու ուղղութեամբ, մանաւանդ որ Ադրբեջանը շարունակում է չկատարել Արդարադատութեան միջազգային դատարանի պարտադիր իրաւական ուժ ունեցող որոշումները՝ Լաչինի միջանցքով մարդկանց, բեռների, տրանսպորտային միջոցների անարգել տեղաշարժը ապահովելու մասին»,- ընդգծած է ան:
Փաշինեան յիշեցուցած է Արդարադատութեան միջազգային դատարանի որոշումները՝ Լաչինի միջանցքը բանալու մասին եւ նշած, որ Ատրպէյճանը պիտի շարունակէ չկատարել դատարանի որոշումը. «Միջազգային ամենաբարձր ատեանները վերջին շրջանի իրենց յայտարարութիւններով ամրագրեցին, որ Արդարադատութեան միջազգային դատարանի որոշումներին Ադրբեջանի տուած մեկնաբանութիւնները որեւէ կապ չունեն իրականութեան հետ, եւ, որ Ադրբեջանը պարտաւոր է ապահովել Լաչինի միջանցքի անխափան աշխատանքը»:
