image
Հրատապ լուրեր:

Աթէնքէն «կարծր» կեցուածք. Անգարա իրաւունք չունի ուժով սպառնալու

Աթէնքէն «կարծր» կեցուածք. Անգարա իրաւունք  չունի ուժով սպառնալու

Յունաստանի արտաքին գործոց նախարարութիւնը արձագանգեց Աթէնքի հասցէին թրքական սպառնալիքներուն՝ յայտնելով. «Թուրքիա իրաւունք ունի բոլոր օրինական միջոցներով պաշտպանելու իր շահերը` պայմանով, որ անիկա ընդունի միջազգային օրէնքի արժեչափերը: Սակայն Թուրքիա իրաւունք չունի կոպտօրէն խախտելու միջազգային օրէնքը եւ պատերազմով սպառնալու Յունաստանին: Յունաստան հանդէս կու գայ երկխօսութեան օգտին` միջազգային օրէնքի հիման վրայ, սակայն անհրաժեշտութեան պարագային, պիտի պաշտպանէ իր օրինական շահերը եւ իրաւունքները»:

Եւրոպական յանձնաժողովի արտաքին գործոց յանձնակատար Փիթըր Սթանօ իր կարգին Թուրքիոյ կոչ ուղղեց՝ յարգելու Եւրոպական Միութեան անդամ երկիրներու գերիշխանութիւնը: Սթանօ պահանջեց «բոլոր հարցերը լուծել բարի դրացիութեան ոգիով` միջազգային օրէնքին նկատմամբ ամբողջական յարգանքով»:

«Եւրոպական Միութիւնը Թուրքիոյ շատ յստակ հասկցուցած է Յունաստանի հետ լարուածութիւնը մեղմացնելու գծով իր ակնկալիքները: Անգարա պէտք է անցնի փոխշահաւէտ եւ արդիւնաւէտ համագործակցութեան ո՛չ միայն Յունաստանի, այլ նաեւ ամբողջ Եւրոպական Միութեան հետ», ընդգծեց Սթանօ:

Միւս կողմէ, Թուրքիոյ նախագահ Ռեչեփ Թայիփ Էրտողան քննադատեց Միացեալ Նահանգները, Անգարայի եւ Աթէնքի միջեւ վէճին նկատամամբ «կողմնակալ դիրքորոշում եւ  անհաւասար վերաբերմունք որդեգրելու» համար: Ըստ անոր՝ Միացեալ Նահանգները «չի կրնար Թուրքիոյ նման այլ դաշնակից գտնել»:

«Միացեալ Նահանգներէն մեր ակնկալիքը այն է, որ Յունաստանը չներգրաւուի սխալ հաշուարկներու մէջ եւ չարտօնուի, որ միջազգային հասարակական կարծիքը շահարկուի», աւելցուց ան:

Էրտողան նաեւ դատապարտեց Կիպրոսի օրինական կառավարութեան զէնք մատակարարելու արգելքը ջնջելու՝ Ուաշինկթընի որոշումը` զայն «անբացատրելի» որակելով եւ սպառնալով, որ այդ քայլը «անպատասխան պիտի չմնայ»։

Յիշեցնենք, որ կղզիին բռնագրաւուած հատուածին վրայ 40 հազար թուրք զինուորներ կը մնան: