9.09c
Երեվան
կրկ, մյս 19
ՀՀ վարչապետ Նիկոլ Փաշինեան ուղերձ յղած է Ղարաբաղեան շարժման 35-րդ տարեդարձի առթիւ։ Ուղերձին մէջ, մասնաւորապէս, ըսուած է․
«35 տարի առաջ այս օրերին սկսուեց ղարաբաղեան շարժումը: 1988 թուականի փետրուարի 20-ից սկիզբ առած բողոքի ինքնաբուխ ու բազմամարդ ցոյցերը Հայոց պատմութեան մէջ կը մնան որպէս ազգային զարթօնքի, միասնութեան ու ազատագրական պայքարի խորհրդանիշ:
Շարժումը մեր պետականութեան վերականգնման առաջին քայլը հանդիսացաւ, որով վերագտանք ազատ եւ անկախ ապրելու, մեր ճակատագիրը կերտելու ու մեր ապագան տնօրինելու վճռականութիւնը:
Ղարաբաղեան շարժումն արցախցիների՝ իրենց իրաւունքները պաշտպանելու եւ սեփական հողի վրայ արժանապատիւ կեանքով ապրելու իրաւունքն ու կամքն արտայայտելու համար էր:
35 տարի անց էլ Լեռնային Ղարաբաղի հայութիւնը կանգնած է լրջագոյն մարտահրաւէրների առաջ: Այսօր էլ մեր հայրենակիցները գտնուելով շրջափակման մէջ՝ ստիպուած են իրենց իրաւունքների ու անվտանգութեան պաշտպանութեան կամքն արտայայտել: Ինչպէս բազմիցս եմ նշել՝ Ադրբեջանի այս գործողութիւնները մէկ նպատակ ունեն՝ կոտրել սեփական Հայրենիքում ապրելու Լեռնային Ղարաբաղի բնակչութեան կամքը, ինչը, սակայն, համոզուած եմ, անկոտրում է ու անսասան:
Յարգելի հայրենակիցներ,
Մենք շարունակում ենք բազմապատկել մեր ջանքերը՝ Լեռնային Ղարաբաղում ծայր առած հումանիտար ճգնաժամի վրայ միջազգային ուշադրութիւնը կեդրոնացնելու ուղղութեամբ, քանի որ միայն միջազգային հանրութեան չնուազող ակտիւութիւնն է Ադրբեջանի ագրեսիւութիւնը եւ սադրիչ գործելակերպը զսպելու, 2020 թուականի նոյեմբերի 9-ի եռակողմ յայտարարութեամբ ստանձնած պարտաւորութիւնները լիարժէք իրականացնելու եւ Լաչինի միջանցքն ապաշրջափակելու եղանակը:
Միաժամանակ, մենք շարունակելու ենք արցախահայութեան սոցիալ-տնտեսական խնդիրների լուծման, անվտանգային մարտահրաւէրների յաղթահարման, Արցախի հայութեան իրաւունքների ու անվտանգութեան պաշտպանութեան մեխանիզմների ձեւաւորմանն ուղղուած մեր հետեւողական քայլերը: Այս նպատակների իրականացումը պահանջում է անմնացորդ աշխատանք ու այդ աշխատանքի մէջ պիտի լինենք անսասան:
Սիրելի արցախցիներ,
Եղէք ամուր եւ անկոտրում՝ յանուն հայրենիքում խաղաղ, անվտանգ ապրելու եւ արարելու: Համաշխարհային եւ տարածաշրջանային նոր մարտահրաւէրներին յանդիման, մենք պիտի կեդրոնացնենք մեր ուժերը խաղաղութեան օրակարգի իրագործման համար, որքան էլ հասկանում ենք այդ ճանապարհին մեզ սպասուող բարդութիւններն ու խնդիրները: Մեծ հաշուով խաղաղ, արժանապատիւ եւ անվտանգ կեանքն է եղել Ղարաբաղեան շարժման բովանդակային նպատակը եւ մենք պիտի շարժուենք այդ նպատակին ընդառաջ»:
