34.17c
Երեվան
հնգ, հլս 23
Հայաստանի տնտեսական աշխուժութեան ցուցանիշը (ՏԱՑ) 2019 թուականի Յունուարին 6,1 տոկոսով աճած է 2018 թուականի Յունուարին համեմատ:
«Արմէնբրես»-ի հաղորդմամբ` ՀՀ ազգային վիճակագրական կոմիտէն ներկայացուցած է երկրի ընկերա-տնտեսական վիճակը բնութագրող նախնական հիմնական տնտեսական ցուցանիշները:
2019-ի Յունուարի ցուցանիշներով շինարարութեան ոլորտին մէջ աճը կազմած է 22,1 տոկոս: Ելեկտրականութեան արտադրութեան ցուցանիշը 26,3 տոկոսով նուազած է նախորդ տարուան նոյն ժամանակահատուածի համեմատ: Ծառայութիւններու ծաւալը (առանց առեւտուրի) աճած է 15,6 տոկոսով:
Սպառողական գիներու ցուցանիշը աւելցած է 0,6 տոկոսով, իսկ արդիւնաբերական արտադրանքի գիներու ցուցանիշը նուազած է 2,6 տոկոսով:
Առեւտուրի շրջանառութիւնը աւելցած է 19,3 տոկոսով: Արդիւնաբերական արտադրանքի ծաւալը 0,4 տոկոսով պակաս է 2018-ի Յունուարին համեմատ: Միջին ամսական անուանական աշխատավարձը աճած է 4,1 տոկոսով (172 հազար 198 դրամ): Պետական հատուածին մէջ միջին ամսական անուանական աշխատավարձը կազմած է 149 399 դրամ, նախորդ տարուան համեմատ աճելով 6,5 տոկոսով, իսկ մասնաւոր հատուածին մէջ կազմած է 184 հազար 646 դրամ` աճելով 1,8 տոկոսով:
Արտաքին ապրանքաշրջանառութեան ծաւալները 2019-ի Յունուարին նախորդ տարուան նոյն ժամանակահատուածին համեմատ նուազած են 7,6 տոկոսով, ի դէպ` արտահանումը նուազած է 15,8 տոկոսով, իսկ ներմուծումը` 3,3 տոկոսով: Դրամի փոխարժէքը ԱՄՆ տոլարի նկատմամբ 2019-ի Յունուարին եղած է 485,79:
