30.51c
Երեվան
հնգ, հլս 23
Հայաստանի մէջ պատահական մարդ ներդրում չէ ըրած, կամ եղած է ախպեր, կամ ախպօր ախպեր, կամ ախպօր ախպօր ախպեր, այսօր Ազգային ժողովէն ներս «Բարգաւաճ Հայաստան» խմբակցութեան պատգամաւոր Սերկէյ Բագրատեանի դիտարկաման այսպէս արձագանգած է վարչապետ Նիկոլ Փաշինեանը՝ յայտարարելով՝ իրենք կը հրաժարին ներդրումներու այս համակարգէն։
Բագրատեանը մասնաւորապէս նշած է, որ պէտք չէ ըսել՝ «պայմանը կայ՝ աշխատէք»։ «Կառավարութիւնը պէտք է պատուիրի ծրագրեր եւ միջազգային հարթակներում վաճառի այդ ծրագրերը, որովհետեւ առանց ներդրումների արդիւնք չի ստեղծուի։ Կառավարութիւնը կարծես այստեղ ձեռքերը լուանում է՝ չներդնել, ստանալ արդիւնք։ Առաջարկում ենք ակրեսիւ տնտեսական քաղաքականութեամբ իրացնել յեղափոխութիւնը»,-ըսած է ԲՀԿ պատգամաւորը։
Փաշինեանը հակադարձած է՝ ընդգծելով՝ այսօր դաշտ կը ստեղծեն, որպէսզի «ոչ թէ ախպերները լինեն տնտեսութեան դերակատարը», այլ՝ գաղափարները եւ մեխանիզմները։
«Մինչեւ հիմա ներդրում ասելով ի՞նչ է հասկացել Ազգային ժողովը։ Կը ներէք, բայց որպէսզի այդ թեման փակուի, այս համեմատութիւնը պէտք է բերեմ՝ սովորաբար կառավարութիւնում եւ Ազգային ժողովում հաւաքուել են լաւ տղերքը եւ երբ որ ներդրում են ասել, ասել են՝ «Հիմա մենք ո՞նց պէտք է ներդրում բերենք, մենք բոլորս ախպերներ ենք, եւ մենք ունենք ուրիշ լաւ ախպերներ, եւ կան լաւ ախպօր ախպերներ, կան ախպօր ախպօր ախպերներ, հիմա մենք ներդրումներ պէտք է բերենք Հայաստան, որ լաւ լինի, ո՞նց ենք մենք ներդրում բերում։ Դէ ամէն մէկս պէտք է ասենք մեր ախպօրը, մեր ախպերները պէտք է ասեն իրենց ախպերներին, մեր ախպօր ախպերներն՝ իրենց ախպերներին, եւ ախպերներով պէտք է գանք ներդրում անենք, մի բան անենք, մի բան լինի»։ Եկէք նայէք մեր երկրի ներդրումների պատմութիւնը, ինչի պատահական մարդ մեր երկրում ներդրում ա արե՞լ՝ կամ եղել ա ախպեր, կամ ախպօր ախպեր, կամ ախպօր ախպօր ախպեր, դրա համար էսօր Հայաստանի ամբողջ տնտեսութիւնը կամ ախպեր ա, կամ ախպօր ախպեր, կամ ախպօր ախպոր ախպեր։ Մենք ասում ենք՝ այս համակարգից հրաժարւում ենք, սա է յեղափոխութիւնը, մենք դաշտ ենք ստեղծում, որպէսզի ոչ թէ ախպերները լինեն տնտեսութեան դերակատարը, այլ լինեն գաղափարները, լինեն մեխանիզմները։ Մենք էսօր ներդրումներ ենք խրախուսում», - ըսած է վարչապետը։
