Մինչ երկիրը կը շարունակէ մնալ առանց կառավարութեան, անդին լրատուական ծառայութիւններ տեղեկութիւններ կը տարածեն կառավարութեան մէջ երկրորդ հայ նախարարի անուան վերաբերեալ: Այս մասին «Արեւելք» տեղեկութիւն ստացաւ Պէյրութի իր աղբիւրներէն:
Մեր աղբիւրներուն հաղորդմամբ, շատ հաւանական է, որ վարչապետ Հարիրիի կազմելիք կառավարութեան անդամ երկրորդ հայ նախարարը ըլլայ թեկնածուն Լիբանանեան ուժեր կուսակցութեան:
Նշեքն նաեւ, որ շրջանառութեան մէջ դրուած են բազմաթիւ անուններ, սակայն մինչեւ այս պահը յստակ տուեալներ չեն փոխանցուիր:
Յիշեցնենք, որ աւելի վաղ, լիբանանահայ համայնքը եւ յատկապէս Արամ Ա. Կաթողիկոսը, ինչպէս նաեւ ՀՅԴ-ի պատասխանատուները յայտարարութիւններ կատարած էին այս խնդրին վերաբերեալ, նշելով, որ շատ կարեւոր եւ անհրաժեշտ է, որ լիբանանահայութիւնը ճիշդ ձեւով ներկայացուի կառավարութեան մէջ, եւ եթէ առաջին նախարարական աթոռը տրուի ՀՅԴ-ին, ապա երկրորդ նախարարական աթոռը պէտք է կիսեն միւս երկու աւանդական քաղաքական ուժերը, այսինքն՝ ՌԱԿ-ը եւ ՍԴՀԿ-ը:
Յիշեցնենք, որ հինգ ամիսներէ ի վեր Լիբանան կը շարունակէ մնալ առանց կառավարութեան եւ ըստ երեւոյթին վերջին շաբաթներու զարգացումները ցոյց կու տան, որ կառավարութեան կազմութիւնը տակաւին կրնայ յամենալ: