7.09c
Երեվան
չրք, ապր 16
Լեհաստանը դարձած է ռազմական արտադրանքի ներմուծման առաջատարը։ Անոր կը յաջորդեն Ռումանիան, Հնդկաստանը, Իսրայէլը եւ Հոլանտան։
«Արմէնփրէս»-ի հաղորդմամբ՝ այս մասին կը վկայեն Զէնքի համաշխարհային առեւտուրի վերլուծութեան կեդրոնի հրապարակած վարկանիշային աղիւսակի տուեալները։
Աղիւսակին մէջ տեղ գտած է 20 երկիր, որոնք 2024 թուականին ամենամեծ ծաւալով ռազմական նշանակութեան ապրանքներու գնման պայմանագիրներ կնքած են։
2024 թուականին Լեհաստանը զէնքի գնման համար ծախսած է 15,625 միլիառ տոլար (համաշխարհային շուկայի 12,80%-ը): Ըստ կեդրոնի փորձագէտներու՝ ընդհանուր առմամբ, վերջին 4-ամեայ ժամանակամիջոցին՝ 2021-2024 թուականներուն, Լեհաստանը կնքած է ռազմական նշանակութեան արտադրանքի ներմուծման 68,261 միլիառ տոլարի պայմանագիրներ (համաշխարհային շուկայի 13,38%-ը) եւ գրաւած է աշխարհի մէջ առաջին տեղը՝ բաւական առաջ անցնելով զէնքի միւս խոշոր գնորդներէն։
Երկրորդ հորիզոնականը զբաղցնող Ռումանիան 2024 թուականին գնած է 10,251 միլիառ տոլարի զէնք (8,40%), Հնդկաստանը՝ 9,410 միլիառ տոլարի (7,71%), Իսրայէլը՝ 8,2 միլիառ տոլարի (6,72%), իսկ Հոլանտան՝ 7,922 միլիառ տոլարի (6,49%):
Զէնքի գնման ծաւալով վեցերորդ հորիզոնականը կը զբաղցնէ Թուրքիան, որ ձեռք է բերած է 7 միլիառ տոլարի զէնք։
Առաջին տասնեակը կ՚եզրափակեն համապատասխանաբար Իրաքը, Հարաւային Քորէան, Սէուտական Արաբիան եւ Ինտոնեզիան։
Ատրպէյճանը կը գրաւէ վարկանիշային աղիւսակի 16-րդ հորիզոնականը։ Պաքուն 2024 թուականին ձեռք բերած է 2,220 միլիառ տոլարի զէնք։ ԱՄՆ-ն գնած է 2,073 միլիառ տոլարի զէնք եւ յայտնուած 17-րդ հորիզոնականին վրայ։
