image

The Economist. Կազայի պատերազմը տնտեսական մեծ բեռ է Իսրայէլի համար

The Economist.  Կազայի պատերազմը  տնտեսական մեծ բեռ է Իսրայէլի համար

«The Economist» ամսագրի զեկոյցին մէջ կը խօսուի Կազայի դէմ յարձակման հետեւանքով Իսրայէլի տնտեսական վիճակի վատթարացման եւ   պատերազմի ծախսերուն մասին։ «Կրնա՞ք ձեզի թոյլ տալ այս պատերազմը վարելու ծախսերը»,-հարց  տուած է  պարբերականը։

Լուրը համադրեց՝ «Արեւելք»ը. Հիմնական աղբիւր՝ «Ալ Մայատին»ը։

«The Economist» ամսագրի զեկոյցին մէջ ըսուած է, որ Կազայի դէմ  այս պատերազմը,-«նախատեսուածէն աւելի ծախսալից է Իսրայէլի համար», նշելով, որ հոկտեմբերէն դեկտեմբեր  եղած ժամանակահատուածին Իսրայէլի տնտեսութիւնը տարեկան դրութեամբ կրճատուած է մէկ հինգերորդով` նախորդ երեք ամիսներու համեմատ:

Ըստ զեկոյցին, նոյն ժամանակահատուածին աւելի քան 750,000 մարդ կամ աշխատուժի մէկ վեցերորդը գործազուրկ էր, որոնցմէ շատերը տարհանուածներ կամ պահեստազօրայիններ են։

Միւս կողմէ, անցեալ ամիս Moody's վարկանիշային գործակալութիւնը առաջին անգամ ըլլալով իջեցուցած է Իսրայէլի վարկային վարկանիշը. բան մը, որ մեծ հարցադրումներու դուռ կը բանայ, որ արդեօք Իսրայէլ   պիտի կարողանա՞յ պատերազմի բեռան  տակէն դուրս գալ։

Աղբիւրը կը գրէ, որ այսօր Իսրայէլի մէջ հիմնական խնդիրը ֆինանսական է։ 7 Հոկտեմբերի նախօրէին Իսրայէլի  արտաքին պարտք-ՀՆԱ յարաբերակցութիւնը կը կազմէր 60%, իսկ 7 հոկտեմբերէն մինչեւ դեկտեմբերը բանակը, ի յաւելումն իր սովորական ծախսերուն, ծախսած է 30 միլիառ շեքել (8 միլիառ տոլար), որ  ՀՆԱ-ի 2%-ին համարժէք է։

Հարցը չի սահմանափակուիր միայն «բանակ»ի համար աւելի մեծ պիւտճէով, քանի որ Իսրայէլի կառավարութիւնը նաեւ մեծ գումարներ կը ծախսէ տարհանուածները տեղաւորելու եւ պահեստազօրի զինուորներու աջակցութեան վրայ, ըսուած է զեկոյցին մէջ:

Զեկոյցը ցոյց տուած է, որ շատերը այժմ «մտահոգուած են», որ Նաթանիահուի պիւտճէն «չափազանց մեծ» է, այն ժամանակ, երբ կառավարութեան պարտքը կայունացնելու ծրագիր պէտք է, մինչդեռ ծախսերը կը մնան բարձր:

Միւս կողմէ  Իսրայէլի  տնտեսական  քաղաքականութիւնը  մշակողները մտահոգուած են, որ ընկերութիւններէն գանձուելիք հարկերը աւելացնելը պատճառ կրնայ դառնալ արհեստագիտական ոլորտը երկրէն դուրս մղելու։ Ինչպէս նաեւ ընտանիքներու վրայ աւելի խիստ հարկեր սահմանելը կը յանգեցնէ սպառման լճացման եւ կը դժուարացնէ ապրուստը։

Զեկոյցին մէջ նշուած է, որ այս իրավիճակէն վերականգնումը  չափազանց դանդաղ պիտի ըլլայ. եւ եթէ պարտքը շարունակէ աճիլ,տնտեսութիւնը  պիտի  տուժէ եւ «գործերը աւելիով  պիտի դժուարանան»։