image

Ս. Փեթերսպուրկի մէջ Ալիեւի եւ Փաշինեանի ոչ պաշտօնական զրոյցն արդիւնաւէտ եւ կառուցողական էր. Հաճիեւ

Ս. Փեթերսպուրկի մէջ Ալիեւի եւ Փաշինեանի ոչ պաշտօնական զրոյցն արդիւնաւէտ եւ կառուցողական էր. Հաճիեւ

Ատրպէյճանի նախագահի խորհրդական Հիքմէթ Հաճիեւ յայտարարած է, որ Ս. Փեթերսպուրկի մէջ Անկախ Պետութիւններու Համագործակցութեան (ԱՊՀ) երկիրներու ղեկավարներու հանդիպման ծիրէն ներս Ատրպէյճանի նախագահ Իլհամ Ալիեւի եւ Հայաստանի վարչապետ Նիկոլ Փաշինեանի ոչ պաշտօնական զրոյցն ատրպէյճանական կողմը կը գնահատէ որպէս արդիւնաւէտ եւ կառուցողական փոխգործակցութիւն, որ կը նպաստէ երկու երկիրներու միջեւ խաղաղութեան օրակարգի առաջմղման։

Հաճիեւ բարձր գնահատած է Հայաստանի վարչապետի աշխատակազմի եւ Ատրպէյճանի նախագահի վարչակազմի՝ 7 դեկտեմբերի համատեղ յայտարարութիւնը, որու համաձայն՝ Ատրպէյճան ազատ արձակած է 32 հայ զինծառայողներ, իսկ Հայաստան՝ 2 ատրպէյճանցի զինծառայողներ: Ան պատմական որակած է յայտարարութիւնը, աւելցուցած, որ այն ցոյց տուած է, որ եթէ կողմերը միասին աշխատին, վստահին զիրար, առաջընթացն ապահովուած է:

Պաշտօնեան նաեւ ողջունած է երրորդ երկիրներու ցանկութիւնը՝ նպաստելու կարգաւորման գործընթացին, սակայն, անոր խօսքով, խաղաղութեան հաստատման համար պատասխանատու են Հայաստանը եւ Ատրպէյճանը:

Ան կարեւորած է 3+3 խորհրդատուական հարթակը, ընդգծած Հարաւային կովկասի խնդիրները տարածաշրջանային դերակատարներու ներգրաւմամբ լուծելու կարեւորութիւնը: Միեւնոյն ժամանակ, ան չէ բացառած այլ հարթակներու վրայ հայ-ատրպէյճանական բանակցութիւններու շարունակուիլը:

Հաճիեւ նաեւ կրկին յայտնած է մտահոգութիւն, որ Հայաստան դէմ է իր տարածքով այսպէս կոչուած Զանգեզուրի միջանցքի բացման:

«Այդ իսկ պատճառով մենք այլընտրանքային ճանապարհ ընտրած ենք՝ Իրանի տարածքով»,- աւելցուցած է ատրպէյճանցի պաշտօնեան:

Ատրպէյճանի նախագահի խորհրդականը կրկին մեղադրած է Ֆրանսան՝ տարածաշրջանին մէջ իբր անկայունութիւն սերմանելու եւ Հայաստանի ռազմական աջակցութիւն տրամադրելու համար: