image

Պուրճ Համուտի մէջ. Վառուեցան Հայ Կաթողիկէ Մեսրոպեան վարժարանի տօնածառի լոյսերը

Պուրճ Համուտի մէջ. Վառուեցան Հայ Կաթողիկէ Մեսրոպեան վարժարանի տօնածառի լոյսերը

Ուրբաթ, 1 Դեկտեմբեր 2023-ի երեկոյեան ժամը 7-ին տեղի ունեցաւ Մեսրոպեան բարձրագոյն վարժարանի Կաղանդի տօնածառին լուսաւորման հանդիսաւոր արարողութիւնը վարժարանի շրջափակին մէջ:

Ուրախառիթ պահուն մասնակցելու համար հաւաքուած էին աշակերտներ, ուսուցիչներ եւ բարեկամներ, ներկայութեամբ Պուրճ Համուտի քաղաքապետ պարոն Մարտիկ Պօղոսեանի:

Հանդիսութիւնը սկսաւ Ս. Փրկիչ եկեղեցւոյ փողերախումբի տօնական նուագի կշռոյթին տակ, որմէ ետք բացման խօսքը արտասանեց հանդիսավար տիկին Սալբի Մուղալեան: Ան ըսաւ, որ կաղանդի տօնածառի լուսաւորման արարողութեամբ մենք կը տօնենք լոյսի ծնունդը մեր կեանքին եւ մեր հոգիներուն մէջ. լոյսը, որ մութ ճանապարհի վերջաւորութեան յոյս կը ներշնչէ, որուն միջոցաւ կ՛առաջնորդուինք դէպի ապահով ափ, եւ զոր ցուրտ օրերուն կը փնտռենք ջերմութիւն ստանալու համար: Թող այս տօնածառին փայլքը ծառայէ որպէս յիշեցում՝ մեր բոլորին մէջ գտնուող յաւերժական եւ մնայուն Յիսուս Քրիստոսի լոյսին, որ սկիզբն է Աստուածային սիրոյ եւ մարդկային միասնութեան, եզրափակեց տիկին Մուղալեան:

Գեղարուեստական մասով Ծիծեռնակ երգչախումբը կատարեց երկու երգեր, աշակերտներ Ժան-Փիէռ Վարդանեան, Քէվըն Սոլաքեան, Յակոբ Անտոնեան, Նայիրի Առնէլեան եւ Մարք Կիւլկիւլեան նուագեցին Սուրբ Ծննդեան նուիրուած կտորներ, իսկ Ճեսիքա Խաշոլեան կատարեց մեներգ մը: Այնուհետեւ ներկաներու ծափողջոյններուն տակ Մեսրոպեանի տօնածառը լուսաւորուեցաւ ձեռամբ Պուրճ Համուտի քաղաքապետ պարոն Մարտիկ Պօղոսեանի:

Մեսրոպեանի տնօրէն պարոն Կրէկուար Գալուստ իր խօսքին մէջ անդրադարձաւ լոյսի խորհրդանշական իմաստին, որ կ՛առնչուի կրթութեան, լուսաւորութեան եւ մտքի ու հոգիի մաքրութեան: Ան ըսաւ, որ հայ ազգի զաւակները հարազատ ժառանգներն են հայ հաւատքի հայր Լուսաւորիչին, եւ պիտի ընթանան անոր ճանապարհով՝ ուր ալ գտնուին: Ողջունելով Պուրճ Համուտի քաղաքապետին ներկայութիւնը, պարոն Գալուստ ըսաւ, որ Մեսրոպեանը վաւերական բաղկացուցիչներէն մէկն է ամբողջ հայ սփիւռքի բաբախուն սիրտը հանդիսացող այս քաղաքին, որուն հայեցի նկարագիրի պահպանութեան եւ զարգացման համար պատրաստ է իր գործօն մասնակցութիւնը բերելու քաղաքապետարանի աշխատանքներուն:

Հանդիսութիւնը փակուեցաւ Ս. Փրկիչ եկեղեցւոյ փողերախումբի հնչեցուցած Jingle Bells եւ Joy to the World երգերու նուագով: