18.09c
Երեվան
կրկ, սպտ 29
Հայաստան-Ֆրանսա ռազմատեխնիկական համագործակցութեան վերաբերեալ պաշտօնական Պաքուի արձագանգը տարակուսանքի տեղիք կու տայ: Այս մասին յայտարարութիւն տարածած է ՀՀ Արտաքին գործոց նախարարութիւնը նշելով, որ մարտունակ եւ ժամանակակից զինտեխնիկայով սպառազինուած բանակ ունենալը ցանկացած երկրի ինքնիշխան իրաւունքն է:
«Հայաստանի Հանրապետութիւնը ճանաչում է իր բոլոր հարեւանների տարածքային ամբողջականութիւնն ու սահմանների անխախտելիութիւնը: Հայաստանն ու Ադրբեջանը բարձրագոյն մակարդակում պայմանաւորուել են, որ ճանաչում են միմեանց տարածքային ամբողջականութիւնը եւ ինքնիշխանութիւնը՝ 1991 թուականի Ալմա-Աթայի հռչակագրի հիման վրայ: Հայաստանի Հանրապետութիւնը հաւատարիմ է այս սկզբունքին եւ միջազգայնօրէն ճանաչուած իր 29 հազար 743 քառակուսի քիլոմեթր տարածքից դուրս յաւակնութիւններ չունի: Հայաստանի Հանրապետութիւնն այս մօտեցումը գործնականում ապացուցել է Հայաստանի Հանրապետութեան Տաւուշի մարզի եւ Ադրբեջանի Հանրապետութեան Ղազախի շրջանի չորս գիւղերի շրջանում սահմանազատում իրականացնելու նախաձեռնութեամբ: Ադրբեջանին կոչ ենք անում վերջ դնել ՀՀ աւելի քան 30 գիւղերի կենսական նշանակութեան տարածքների օկուպացիային (բռնագրաւում):
Ամէն առիթով տարածաշրջանային սրացումներ կանխատեսելու Ադրբեջանի գործելակերպը մտածելու տեղիք է տալիս եւ գալիս է հիմնաւորելու մի շարք կեդրոնների կողմից արուող վերլուծութիւնները, թէ Ադրբեջանն ամէն ինչ անելու է վիժեցնելու Հայաստանի հետ խաղաղութեան համաձայնագիր կնքելու գործընթացը, 2024թ. նոյեմբերին Բաքւում կայանալիք COP29 գագաթաժողովից յետոյ Հայաստանի Հանրապետութեան նկատմամբ նոր ագրեսիա (յարձակողական) ձեռնարկելու համար:
Միջազգային հանրութեան ուշադրութիւնը հրաւիրում ենք այս, ինչպէս նաեւ այն փաստի վրայ, որ 1 ամսուայ ընթացքում խաղաղութեան համաձայնագիր կնքելու պաշտօնական Երեւանի առաջարկը պաշտօնական Բաքուի կողմից մնացել է անարձագանգ», - ըսուած է յայտարարութեան մէջ:
