19.09c
Երեվան
չրք, մրտ 12
Հայաստանի Ազգային ժողովը այսօր հերթական քառօրեայ նիստն սկսելէ առաջ մէկ վայրկեան լռութեամբ յարգած է 1988 թուականի Սպիտակի երկրաշարժի զոհերու յիշատակը, կը յայտնէ «Հայ Ձայն»ի թղթակիցը:
1988 թուականի Դեկտեմբերի 7–ին 10 աստիճան ուժգնութեամբ երկրաշարժը ցնցեց Հայաստանի մէկ մասը՝ Գիւմրին, Սպիտակը, Վանաձորը եւ այլ բնակավայրեր։ Երկրաշարժէն վնասի գօտիի մակերեսը կազմեց 10 000 քմ քառակուսի‚ ուր կ'ապրէր 1 միլիոն բնակիչ։ Ուժեղ աւերման գօտիի մակերեսը եղաւ 3000 քմ քառակուսի։ Քանդուեցան 11 քաղաքներ, 58 գիւղեր, տուժեց 21 քաղաք, 342 գիւղ։ Անօթեւան մնաց 514.000 մարդ։
Աւերիչ երկրաշարժի հետեւանքով զոհուեցաւ 25.000 մարդ‚ այդ թուին՝ Գիւմրիի մէջ՝ 17.000, Սպիտակի մէջ՝ 4000, Վանաձորի մէջ՝ 1200, Ախուրեանի մէջ՝ 500, Ստեփանաւանի մէջ՝ 125։
