Նահանջը առանց երգի
«Ազդակ», 31/8/24 — 2/9/24
***Ռուսիոյ իշխանութիւնները լիակատար կերպով կ’աջակցին:
---Ռուսիոյ իշխանութիւնները լիովին կ’աջակցին:
***Յանձնախումբը կոչ ուղղեց երկիրը ամբողջական կերպով փակելու:
---Յանձնախումբը կոչ ուղղեց երկիրը ամբողջովին փակելու:
Ծանօթ.— Հաւանաբար այս ոճով կը խօսէին ու կը գրէին... ենիչերիները:
* * *
***[Էրտողան.] Ազրպեյճանի հետ միասին կ’աջակցինք իրաւահաւասարութ-եան...
---[Էրտողան.] Ազրպեյճանի հետ կ’աջակցինք իրաւահաւասարութեան...
---[Էրտողան.] Մենք եւ Ազրպեյճան միասին կ’աջակցինք...
---[Էրտողան.] Մենք եւ Ազրպեյճան միասնաբար կ’աջակցինք...
***Իսրայէլեան բանակը հեռացաւ Խան Եունէսի... մեծամասնութենէն...
--Հայերէնին եւ հայեցի լեզուազգացողութեամբ նուիրականացած է մեծամասնութիւն բառով բնորոշել մարդկային հաւաքականութեան մը մեծագոյն մասը, օրինակ՝ ձայներու, ընտրողներու, հարցաքննուողներու: Տարածութեան համար կ’ըսենք՝ մեծ մասը, մեծ մասին, մեծ մասէն:
***Թշնամին պնդեց, որ կանխարգելիչ գործողութիւն կատարած է եւ կանխարգիլած է ... յարձակում մը:
---Թշնամին պնդեց, որ կանխարգելիչ գործողութիւն կատարած է եւ առաջքը առած է ... յարձակումի մը:
***Եթէ նախագահի ընտրութեան գործընթացը մինչեւ այդ ժամկէտը չկատարուի...
Գործընթաց եւ կատարուիլ հասկացութիւնները համատեղելի չեն: Այսպէս կարելի չէ ո՛չ մտածել, ո՛չ խօսիլ, ո՛չ ալ հաղորդակցիլ: Ստացուածը ո՛չ բանական միտք է, ո՛չ բանական լեզու է:
Փորձենք հայու պէս մտածել ու հայերէն ըսել՝
---Եթէ նախագահի ընտրութիւնը մինչեւ այդ ժամկէտը չկատարուի:
---Եթէ նախագահի ընտրութիւնը մինչ այդ տեղի չունենայ:
***Կեդրոնական դրամատունը պիտի շարունակուի կառավարուիլ:
Այս երկու կրաւորականները չեն կրնար գոյակցիլ. պարտինք ըսել՝
---Կեդրոնական դրամատունը պիտի շարունակէ կառավարուիլ:
***Ան Հայաստանի իշխանութիւնները մեղադրեց արցախցիներու տուն վերադարձի խոչընդոտը ըլլալու յանցանքով:
---Ան Հայաստանի իշխանութիւնները ամբաստանեց արցախցիներու տուն վերադարձը խոչընդոտելու մեղադրանքով:
***Պէտք է բաւարար նկատել Միութեան խումբի դուրս բերման համար:
---Պէտք է բաւարար նկատել Միութեան խումբի դուրսբերման համար:
դուրս բերել > դուրսբերում մէջ(ը) բերել > մէջբերում
***Հետամուտ ըլլալ Արցախի հիմնահարցը բանակցային օրակարգին մէջ ներառելուն:
---Արեւելահայերէնը, որմէ առնուած ու փոխադրուած է այս հատուածը, որոշիչ յօդով կը կիրարկէ տրական հոլովը՝ ներառելուն: Արեւմտահայերէնը այս պարագային կը մերժէ այդ որոշիչ յօդը ու կը գրէ՝ ներառելու:
***Ռուսիան, Թուրքիան, Սուրիան եւ Իրանը Անգարայի եւ Դամասկոսի միջեւ յարաբերութիւններու կարգաւորման շուրջ հանդիպում պիտի կատարեն:
---Ռուսիա, Թուրքիա, Սուրիա եւ Իրան Անգարայի եւ Դամասկոսի միջեւ յարաբերութիւններու կարգաւորման հանդիպում պիտի կատարեն:
***Ուքրանիոյ պաշտօնատարները բազմիցս դիմած են դաշնակիցներուն... Ուքրանիոյ արտօնելու Արեւմուտքին տրամադրած զէնքով հարուածել Ռուսիոյ խորքին մէջ գտնուող զինուորական դիրքերը:
---Ուքրանիոյ պաշտօնատարները բազմիցս դիմած են դաշնակիցներուն... Ուքրանիոյ արտօնելու Արեւմուտքին տրամադրած զէնքով հարուածել Ռուսիոյ խորերը գտնուող զինուորական դիրքերը:
***Պորել կը շարունակէ ճնշում բանեցնել Ուքրանիոյ արեւմուտքցի դաշնակիցներուն վրայ...
---Պորել կը շարունակէ ճնշում բանեցնել Ուքրանիոյ՝ Արեւմուտքի դաշնակիցներուն վրայ...
---Պորել կը շարունակէ ճնշում բանեցնել Ուքրանիոյ արեւմտեան դաշնակիցներուն վրայ...
***Ոչ ոք կ’ուզէ Ռուսիոյ հետ պատերազմ:
---Ոչ ոք պատերազմ կ’ուզէ Ռուսիոյ դէմ:
Պատերազմիլ հետը՝ կը նշանակէ միասին, ընկերովի պատերազմիլ:
***Ոչ ոք մեզի կ’արգիլէ մեր հարազատներուն հետ հանդիպելէ:
---Ոչ ոք մեզի կ’արգիլէ մեր հարազատներուն հետ հանդիպիլ:
Արգիլել ներգործական է եւ հայցական հոլով կը պահանջէ՝ հանդիպիլ:
Մրցոյթ 185.
***Գտի՛ր քերականական սպրդած սխալը ու սրբագրէ՛ զայն:
---Պայրամով այսօր կը հասնի Անքարա, ուր Ֆիտանի հետ կը քննարկէ խաղաղութեան պայմանագիրը:
***Հետեւեալներուն մէջ մէկական բառ փոխարինումի կը կարօտի.
---Բազմաթիւ անօդաչու սարքեր անվրէպ ուղղուեցան իրենց թիրախներուն:
---Այդ ձերբակալումը տեղի ունեցաւ դատարանի մէկ որոշումին հիմամբ:
***Ո՞ր բառերը կրնանք ազատօրէն ջնջել հետեւեալներուն մէջ:
---Պտղատու ծառերը կը կտրեն, որովհետեւ բերքը քաղելն իսկ բազմածախս է:
---Լիբանանի հետ սահմանային բախումներուն հետեւանքով մահացած է զինուոր մը:
Ճիշդ պատասխանած են՝ Արազ Գոճայեան (6), Գեղամ Խաչատրեան (6), Համբարձում Յարթունեան (5), Ցոլակ Ապտալեան (5), Վահէ Աբէլեան (9), Պերճ Տէր Սահակեան (9), Եփրեմ Թոքճեան (3):
Մրցոյթ 186.
***Աշակե՞րտ, թէ՞ աշակերտներ կը դնես կէտերուն փոխարէն:
---Անձնապէս երբեք չեմ հաւատացած, որ յօդուածներով, բեմերէ արտասանուած խօսքերով կամ այլ միջոցներով հայ դպրոցը կրնայ . . . . . . . . . հաւաքել:
***Հայեցի վերաշարադասէ՛ հետեւեալ... մահազդը:
---Վերջին նիստը մօտ 20 օր առաջ տեղի ունեցած է, յաջորդը 5 սեպտեմբերին նախատեսուած է :
***Հետեւեալէն կարելի է զեղչել երեք բառ. գտի՛ր ու զեղչէ՛ զանոնք.
---Ճամբորդները կը նկատէին, թէ ինչպէ՛ս նաւաստիները կը պայքարէին փոթորի-կին դէմ եւ թէ ինչպէ՛ս անոնց բազուկները աստիճանաբար կը թուլանային:
***Սրբագրէ սպրդած քերականական սխալը:
---Որոշած են աջակցիլ պաղեստինցի ժողովուրդին եւ անոնց խիզախ ու պատուաբեր դիմադրութեան:
***Դուն ինչպէ՞ս պիտի նախընտրէիր ըսել հետեւեալը.
---Իսրայէլին կողմէ գործուած ոճիրները պիտի չվախցնեն լրագրողները:
Արմենակ Եղիայեան