Հայ Կաթողիկէ Կաթողիկոս-Պատրիարքի Աւստրալիա այցը յաջողութեամբ աւարտեցաւ

Հայ Կաթողիկէ Կաթողիկոս-Պատրիարքի Աւստրալիա այցը  յաջողութեամբ աւարտեցաւ


Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Ռաֆայէլ Պետրոս ԻԱ Կաթողիկոս Պատրիարքի  այցը Աւստրալիա  հասած է իր աւարտին։ Մեծ  յաջողութեամբ պսակուած  այցելութեան աւարտին մասին եզրափակիչ լուր մը հրապարակած է «Ռատիօ Վատիկան»ի հայկական բաժանմունքը,  որ կը ներկայացնենք ստորեւ.

Տանն Կիլիկիոյ Կաթողիկէ Հայոց Ամենապատիւ եւ Գերերջանիկ Ռաֆայէլ Պետրոս ԻԱ Կաթողիկոս Պատրիարքը,, որ անցեալ 22 յուլիսէն ի վեր Հովուապետական այցելութեամբ կը գտնուի Աւստրալիա, ընկերակցութեամբ Արհ. Գէորգ Եպիսկոպոս Ասատուրեանին եւ Հայր Նարեկ Վրդ Մնոյնաին, իր պաշտօնական այցելութիւնները աւարտեց այսօր` 2 օգոստոս 2022-ին հանդիպում ունենալով Սիտնէյի եւ Աւստրալիայի Առաջնորդ` Արհիապատիւ Անթոնի Արքեպիսկոպոս Քոլին Ֆիշերին հետ։ Հոգեւոր Տիրոջ պատուիրակութեան մաս կը կազմեր նաեւ տեղւոյն Հայ Կաթողիկէ Եկեղեցւոյ Հովիւ` Գերյ. Բարսեղ Թ. Ծ. Վրդ. Սուսանեանը։

Ռաֆայէլ Պետրոս ԻԱ կաթողիկոս Պատրիարքին եւ Առաջնորդ Ֆիշերին միջեւ կայացած հանդիպումը ընթացաւ բարեկամական մթնոլորտի մէջ, որուն ընթացքին Ամենապատիւ Հոգեւոր Տէրը եւ Լատին Եկեղեցւոյ Առաջնորդը միասնաբար քննարկեցին Աւստրալիոյ Հայ Կաթողիկէ Եկեղեցւոյ հայող հարցեր, որուն ծիրէն ներս անոնք համաձայն գտնուեցան, որ ժամը հասած է Աւստրալիայի մէջ Հայ Կաթողիկէ Առաջնորդութեան հաստատումին համար ու թէ արգելքներ չկան այդ մէկը մօտ ապագային իրականութիւն դարձնելու։

Այցելութեան առթիւ Ամենապատիւ Հոգեւոր Տէրը Սիտնէյի առաջնորդին նուիրեց Զմմառու ցաւագին Տիրամօր սրբանկարը։

Հոգեւոր Տիրոջ գլխաւորած պատուիրակութիւնը առիթը ունեցաւ այցելելու առաջնորդարանին եկեղեցին ու նկար առնելու եկեղեցւոյ տարածքին տեղադրուած խաչքարին դիմաց, որ նուէրն է Աւստրալիայի Հայութեան եւ որուն բացումը կատարուած է Հայոց ցեղասպանութեան յիշատակութեան 105րդ տարելիցին առիթով։

Յայտնենք, որ վերոնշեալ հանդիպումէն ետք Ամենապատիւ Հոգեւոր Տէրը այցելեց Սիտնէյի հիւանդանոցներ ուր հանդիպեցաւ մի քանի հայ հիւանդներուն հետ անոնց մատակարարելով Սուրբ Հաղորդութեան Խորհուրդը։

Ամենապատիւ եւ Գերերջանիկ Հոգեւոր Տէրը իր Աւստրալիայի պաշտօնական այցելութիւնը կ՜աւարտէ վաղը 3 օգոստոսին` Անոր եւ իրեն ընկերացող պատուիրակութեան անդամներուն Լիբանան վերադարձով։

 

Լուրը՝  «Ռատիօ Վատիկան»ի հայկական բաժանմունքէն