1.09c
Երեվան
կրկ, մրտ 01
Նոյեմբերի 16-ին Ն. Ս. Օ. Տ. Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ուկրաինայի հայերի միութեան նախագահ Վիլեն Շատուորեանին եւ միութեան անդամներին` ուղեկցութեամբ Ուկրաինայի հայոց թեմի առաջնորդ Գերաշնորհ Տ. Մարկոս եպիսկոպոս Յովհաննիսեանի:
Մարկոս Սրբազանը, ողջունելով Ամենայն Հայոց Կաթողիկոսին, ընդգծեց, որ Մայր Աթոռ Սուրբ Էջմիածին են ժամանել իրենց ուխտը նորոգելու եւ Վեհափառ Հայրապետի օրհնութիւնը ստանալու համար: Սրբազան Հայրը ներկայացրեց նաեւ համայնքի քսանամեայ գործունէութիւնն ու առկայ մարտահրաւէրները` փաստելով, որ Ուկրաինայի բոլոր համայնքներում հայութեանն առաջնորդող ուժը միասնականութիւնն է:
Առաջնորդ Սրբազանը Նորին Սրբութեանը տեղեկացրեց, որ Հայաստան կատարած այցելութեան շրջանակներում մասնակցել են Երեւանի Սուրբ Գրիգոր Լուսաւորիչ Մայր եկեղեցու հարեւանութեամբ գտնուող զբօսայգու բացման արարողութեանը, որի բարեկարգման պատասխանատուութիւնը ստանձել էր Ուկրաինայի հայերի միութիւնը:
Այնուհետեւ Վեհափառ Հայրապետը, շնորհաւորելով եւ իր հայրական օրհնութիւնը փոխանցելով ներկաներին միութեան քսանամեակի կապակցութեամբ, ուրախութեամբ արձանագրեց, որ Ուկրաինայի հայ համայքն ամրօրէն կապուած է հայրենիքին եւ պատրաստակամօրէն է արձագանքում Հայաստանում առկայ մարտահրաւէրների յաղթահարմանը:
Հանդիպմանը, անդրադառնալով Ուկրաինայի թեմի ձեւաւորման պատմութեանը եւ գործունէութեան առաջին տարիներին, Նորին Սրբութիւնը իր գնահատանքը յայտնեց տիար Շատուորեանին եւ միութեան բոլոր անդամներին` ձեռքբերումների եւ հայրենիքին ու Եկեղեցուն մատուցած նուիրեալ ծառայութեան համար:
Պարոն Վիլեն Շատուորեանն իր երախտագիտութիւնն արտայայտեց Հայոց Հայրապետին Մայր Աթոռում ջերմ ընդունելութեան, հայրական օրհնութեան եւ զօրակցութեան համար` հաստատելով, որ Եկեղեցին մշտապէս իր ժողովրդի կողքին է:
Վերջում Ամենայն Հայոց Կաթողիկոսը բարեմաղթեց հայորդիներին Աստծոյ օրհնութեամբ բարօր եւ խաղաղ կեանք:
