12.09c
Երեվան
շբթ, մյս 16
Լիբանանում այսօր առավոտյան իր մահկանացուն է կնքել անվանի հայագետ, գրաբարագետ, մեծ ու նվիրյալ հոգեւորական Անդրանիկ ծ. վարդապետ Կռանյանը: «Արեւելքի» տեղեկություններով Կռանյանը մահացել է Հայ Կաթոլիկ պատրիարքության Զմմառի «Սուրբ Տիրամոր» վանքում:
Հայր Անդրանիկ Կռանյանը ծնվել է 1929-ին՝ Լիբանանում: Նախնական ուսումը ստացել է Բեյրութի Հիսուսյան հայրերի Ս. Գրիգոր Լուսավորիչ ճեմարանում: Նվիրվելով հոգեւորական կյանքի` հաճախել է Զմմառի դպրեվանք, այնուհետեւ՝ Հռոմի Լեւոնյան դպրոցն ու Հիսուսյան հայրերի Գրիգորյան միջազգային Համալսարանը:
1954-ին ձեռնադրվել է կուսակրոն քահանա` դառնալով Զմմառի պատրիարքական միաբանության անդամ:
Խմբագրել է Հայ Կաթոլիկ պատրիարքանի «Մասիս» շաբաթաթերթը, իսկ 1990-ից վարել է Հայկազյան համալսարանի «Հայկազեան հայագիտական հանդէս»-ի խմբագրի պաշտոնը:
Դասավանդել է գրաբար, հայ եկեղեցու պատմություն, հայ մատենագրություն՝ Բեյրութի Հայկազյան եւ Կասլիկի մարոնիական Անտոնյան հայրերի համալսարանում:
Հայր Անդրանիկ Կռանյանը բազմաթիվ գրքերի, բառարանների հեղինակ է:
