9.09c
Երեվան
հնգ, ապր 30
Թուրքիոյ խորհրդարանի հայ երեսփոխանները այսօր միասին նշած են Սուրբ Յարութեան հրաշափառ տօնը: Այս մասին «Արեւելք» տեղեկութիւն ստացաւ Պոլսոյ իր աղբիւրէն: Մեր աղբիրը նաեւ յայտնեց, որ Քրիստոսի Յարութեան տօնին առթիւ մատուցուած Սուրբ եւ անմահ պատարագի աւարտին համայնքի պատասխանատու անձնաւորութիւնները, նախագահութեամբ Պոլսոյ Պատրիարքութեան ընդհանուր տեղապահ Տ. Արամ Արք. Աթէշեանի, հաւաքուած են Պատրիարքարանի յարկին տակ: Այս առթիւ խօսք առած է համայնքի կողմէ Թուրքիա ապաստանած հայ փախստականներու հարցերու պատասխանատուներէն ՝ Տ. Տրդատ Քհնյ. Ուզունեան եւ Տիար Պետրոս Շիրինօղլու, որ մանրամասն զեկուցում մը կարդացած է համայնքի նիւթական իրավիճակին մասին: Հանդիսութեան համայնքային տարբեր մակարդակի ներկայացուցիչներու կողքին ներկայ եղած են Թուրքիոյ խորհրդարանի հայ անդամներ Սէլինա Տողան (CHP), Կարօ Փայլան (HDP) եւ Մարգար Եսայեան (AKP): Ըստ մեր աղբիւրին, հայ երեսփոխանները առաջին անգամ ըլլալով է, որ միասնաբար ներկայ կ'ըլլան հրապարակային հանդիսութեան մը:
