20.23c
Երեվան
ուրբ, հլս 24
Վերջին շրջանին Արցախա-ատրպէյճանական հակամարտ զօրքերու սահմանագծի տարբեր հատուածներու վրայ կը նկատուի հակառակորդի գործողութիւններու աճ, որոնք կը դրսեւորուին ինչպէս ճարտարա-ամրաշինական մեծածաւալ աշխատանքներու, այնպէս ալ հրադադարի պահպանման խախտումներու տեսքով: Այս մասին կը յայտնէ Արցախի Հանրապետութեան ՊՆ մամուլի ծառայութիւնը:
Յատկանշական է, որ ատրպէյճանական կողմը պարբերաբար կրակային խոցման թիրախ կ՝ընտրէ ո՛չ միայն ՊԲ առաջնային դիրքերը, այլեւ մարտական հերթապահութիւն իրականացնող հայկական անձնակազմի թիկունքային ապահովման շարժական կէտերը: Մասնաւորապէս՝ ատրպէյճանական զինուժը բոլորովին վերջերս «ՍՎԴ» տիպի դիպուկահար հրացաններով կրակ բացած է ՊԲ արեւելեան (Ակնա) հատուածին վրայ տեղակայուած զօրամասերէն մէկուն հացի ինքնաշարժին ուղղութեամբ՝ վնասելով թափքը, իսկ 3 Մայիսի վաղ առաւօտեան, բանակի հիւսիս-արեւելեան (Մատաղիսի) հատուածին վրայ գտնուող մարտական դիրքերուն ուղղութեամբ խոշոր տրամաչափի դիպուկահար զինատեսակներէ, գնդացիրներէ ու ինքնաձիգերէ արձակած է շուրջ 330 կրակոց:
Արցախի Հանրապետութեան պաշտպանութեան նախարարութիւնը ԵԱՀԿ Մինսկի խումբի համանախագահող երկիրներու ուշադրութիւնը կը հրաւիրէ վերոնշեալ փաստին վրայ՝ միաժամանակ կոչ ընելով ատրպէյճանական կողմին ձեռնպահ մնալու իրադրութիւնը արհեստականօրէն սրելու անհեռանկար մարտավարութենէն:
