29.09c
Երեվան
ուրբ, սպտ 11
ՀՀ Սիւնիքի մարզի Կապանի Ճակատեն, Ներքին Հանդ, Շիկահող, Եղուարդ, Ագարակ, Ուժանիս գիւղերու անմիջական հարեւանութեամբ ատրպէյճանական զինուորականները կրակոցներ արձակած են փոքր, ինչպէս նաեւ խոշոր տրամաչափի զինատեսակներէն, հարբած վիճակի մէջ: Այս մասին յայտնած է ՀՀ Մարդու իրաւունքներու պաշտպան՝ Արման Թաթոյեան:
Նշուած բոլոր գիւղերու բնակիչները եւ համայնքային մարմինները Մարդու իրաւունքներու պաշտպանին, մասնաւորապէս, ահազանգեր ներկայացուցած են այն մասին, որ կրակոցները կ'ըլլան պարբերաբար՝ ինչպէս ցերեկային ժամերուն, այնպէս ալ գիշեր ժամանակ: Ըստ ահազանգերուն՝ կրակոցները պարզ կը լսուին գիւղերուն մէջ, անոնց նպատակն է ահաբեկել խաղաղ բնակիչներն ու առաջին հերթին երեխաներն ու կիները:
Ընդ որում, գիւղացիները դիտարկած են, որ յաճախակի են այն դէպքերը, երբ հարբած վիճակի մէջ ատրպէյճանական զինուորականներ կրակոցներ կ'արձակեն: Եւ այն ատեն կրակոցները խոշոր տրամաչափի զինատեսակներէն են ու ուժգին:
Այս կրակոցներու մասին ահազանգեր ներկայացուած էին Մարդու իրաւունքներու պաշտպանին գլխաւորած պատուիրակութեան դեռ 2021 թուականի 9 յունուարին, Կապանի Ճակատեն եւ այլ գիւղեր այցելելու ընթացքին: Այդ ժամանակ նաեւ անմիջականօրէն արձանագրուած էր, որ կրակոցներով ակնյայտ լարուածութիւն կ'առաջանայ գիւղերուն մէջ:
Այս յանցաւոր, բացարձակ դատապարտելի արարքները պէտք է ի սպառ վերանան: Անոնք դարձած են իրական սպառնալիք Հայաստանի խաղաղ բնակիչներու կեանքի ու առողջութեան պահպանման, ֆիզիքական ու հոգեկան անձեռնմխելիութեան եւ միջազգայնօրէն ճանաչուած ու ՀՀ Սահմանադրութեամբ երաշխաւորուած միւս իրաւունքներու համար: Ասոնք կոպտօրէն կը խախտեն նաեւ երեխաներու շահերը:
Այս փաստը աւելի կ'ամրապնդէ Մարդու իրաւունքներու պաշտպանի համոզմունքը, որ խաղաղ բնակիչներու կեանքի ու կենսական միւս իրաւունքներու համար իրական սպառնալիք է նաեւ ատրպէյճանական զինուած ծառայողներու առկայութիւնը Հայաստանի սահմանային բնակավայրերու անմիջական հարեւանութեամբ, նաեւ միջհամայնքային ու միջպետական ճանապարհներուն:
Այս փաստերու վերաբերեալ հաղորդումներ պիտի ուղարկուին միջազգային կառոյցներուն, ինչպէս՝ ԵԱՀԿ-ին, ՄԱԿ-ին, ԵԽ-ին: Առանձին հաղորդումներ պիտի ուղարկուին նաեւ միջկառավարական կազմակերպութիւններու յատուկ մարմինններուն:
