12.09c
Երեվան
շբթ, մրտ 28
Սէյյիտ Հասան Նասրալլան հօր ընտանիքով մինչեւ 1975-1976 ապրած է ոչ թէ Քարանթինայի, այլ՝ Նապաայի մէջ: Այդ մասին ինք պատմած է Մանար հեռատեսիլի կայանէն: Այդ պատումին մէջ ան կ՛ըսէ, թէ շրջակայքի հայ պատանիներուն դէմ պատերազմ կը մղէին՝ իրարու վրայ քարեր շպրտելով, աւելցնելով, թէ անգամ մը քար ստացած է իր քունքէն: Այդ պատերազմիկ ախմախներուն մէջ ես ալ եղած եմ եւ քանի մը անգամ նման հարուածներու ցաւը վայելած: Ո՜վ գիտէ, կրնայ ըլլալ, որ Նասրալլային հասած քարը իմ նետածս ըլլայ: Այսօր եթէ հանդիպիմ իրեն, ներողութիւն կը խնդրեմ իմ հաւանական ապուշ արարքիս համար ու կը խնդրեմ իրմէ՝ համբուրել այն ճակատը, որ այդպէս բարձր կը պահէ դիմադրութեան արժանապատուութիւնը ամենուրեք:
Հետեւաբար, յարգելի խմբագրութիւն, կը խնդրեմ Քարանթինան ուղդել Նապաա-ով:
Գէորգ Եազըճեան
Յ. Գ. Ի դէպ, Նապաա ապրած ու հոն քարոզած է նաեւ սէյյիտ Մուհամմէտ Հիւսէյն Ֆատլալլան: Այդ մասին ի՛նքը՝ սէյյիտը մեզի ըսաւ, երբ 1989-ին իր Հարաթ Հըրէյքի բնակարանին մէջ հանդիպեցանք Սագօ Օգնայեանին եւ Եղիա Նաճարեանին հետ՝ վերջինիս խնդրանքով:
